خداع انثي ج الاخير

وعادت مره أخرى إلى شقتها وأغلقت الباب وبدأت فى تحضير الطعام ونظرت إلى الساعه بقلق وقالت

-هما مالهم اتأخروا كده ليه

وفى ذلك الوقت دوى جرس الباب ركضت سريعا إلى الباب وفتحته بابتسامه وقالت

-اخواا

ولكنها صمتت فاجئه عندما وجدت رائد بمفرده نظرت له بأستغراب وقالت بتساؤل

-اومال فين اخواتى لسه طالعين على السلم ولا ايه

وتحركت إلى الباب ولكنه امسك يدها وقال بأسف

رائد :- اخواتك مش معايا يا رقيه

نظرت له بأستغراب وقالت

رقيه :- يعنى ايه اخواتى مش معاك حصل حاجه منعت خروجهم ولا ايه !؟

حرك رأسه بالنفى وقال

رائد:- لا اخواتك خرجوا من ساعه

ردت عليه سريعا وقالت

رقيه :- خرجوا من ساعه!! ولما خرجوا من ساعه مجاوش معاك ليه !؟

تنهد بضيق وقال بتوتر

رائد :- أهدى بس يا رقيه وانا هفهمك كل حاجه

حركت رأسها بأستغراب وقالت بغضب

رقيه :- اهدا ايه بس !! فيه ايه يا رائد ما تتكلم على طول اخواتى ايه حصلهم

ابتلع ريقه بتوتر وقال

رائد :- دخلينى بس اقعد وانا هفهمك كل حاجه

وقفت أمامه سريعا وقالت بضيق

رقيه :- مافيش دخول يا رائد وانت عارف كده، ممكن تتكلم بقى وخلصنى بدل التوتر اللى انت معيشنى فيه ده

اخذ نفس عميق وقال

رائد :- بصراحه كده اخواتك مش ناوين على خير ليكى وعايزين ياذوكى وانا لما سمعت كلامهم خوفت عليكى ومشيت أنا والمحامى قبل ما يشوفونا

ابتسمت بتهكم وقالت بعدم تصديق

رقيه :- مين عايز يأذينى ؟ اخواتى أنا !! انت اتجننت يا رائد مستحيل اخواتى يفكروا كده وحتى لو هشام فكر يأذنى مستحيل اسلام يقبل بكده انت اكيد كداب أنا هروح ليهم حالا

وتحركت بأتجاه الخارج

امسك ذراعها سريعا وقال بنبره حزينه

رائد :- أهدى يا رقيه علشان خاطرى أنا عارف انك مصدومه من كلامى ده وقلبك انكسرت فرحته بس وحياتك عندى ده اللى حصل وهشام اثر على اخوكى اسلام علشان ينتقموا منك علشان أمهم حتى أنا كمان عايزين ينتقموا منى ومن بابا علشان احنا السبب فى رميتهم فى السجن دى بس انا والله مخوفتش على نفسى أنا خوفى عليكى انتى يا رقيه أنا أقدر احميكى منهم بس مافيش اى حاجه رسمى تربطنى بيكى والقانون هيكون فى صفهم هما

حركت رأسها بالنفى وظلت تدفعه بقوه وقالت بدموع

رقيه :-مستحيل اسلام اخويا يفكر يأذينى أنا متأكدة انك سمعت غلط ابوس ايدك ودينى ليهم أنا لازم اشوفهم