مريم 2
مريم 2
توهج محيا الأخير غضبًا و هو يقول بخشونةٍ :
-لسا ماتخلقش إللي يرميكي أو يمس شعرة منك طول ما أنا عايش.. عزائي إني كنت بعيد عنك زي ما قولتلك. بس خلاص. أنا رجعت.. و ليا كلام تاني خالص مع أبوكي و أخوكي و إبن عمك ده كمان. هاحاسبهم كلهم على كل حاجة وحشة حصلتلك بسببهم
هالة بلطفٍ : لأ يا خالو بليز.. ماتعملش مشاكل معاهم. خلاص إللي حصل حصل. و هما في الأول و في الأخر أهلي. كفاية الفصل إللي هاعمله فيهم. الحركة دي لوحدها هاتجننهم و أولهم عثمان !
و لم تستطع منع ابتسامتها الخبيثة من الإنبلاج بوضوح على جانب وجهها عندما ذكرت الجزء الأهم من الخطة …
-يا حبيبتي إنتي مش مضطرة تتنازلي عن حقك عشان تنتقمي ! .. قالها “نبيل” بجدية، و تابع :
-أنا سيبتك تفضفضي و تخرجي كل إللي جواكي. لكن قراراتك مالهاش اعتبار عندي.. يعني إيه أقبل إنك تبيعيلي نصيبك في القصر و الشركة ؟ مستحيل ده يحصل يا هالة. إنتي لو محتاجة فلوس أنا تحت أمرك من جنية لمليون و كل إللي تحتاجيه
أخذت تقول “هالة” في محاولة مستميتة لإقناعه :
-يا خالو بس إفهمني.. بابي من فترة جمعني أنا و صالح و قال إنه قرر يساوي بينا في الميراث على حياة عينه. و صالح وافق رغم إن له النصيب الأكبر. بس دي كانت رغبة بابي و هو ماعترضش. دلوقتي كل الأوراق إللي قدامك سليمة و تقدر تتأكد !
و أشارت لمجلد الوثائق و العقود الملقى فوق الطاولة الفاصلة بينهما …
نبيل باستنكار : يابنتي إنتي فكراني مخونك ؟ جرالك إيه يا هالة.. استوعبي كلامي شوية من فضلك. أنا قلت مستعد أساعدك بالمبلغ إللي إنتي عايزاه و مستعد بردو أقدملك أي حاجة تحتاجيها منغير ما أخد قصاد ده كله حاجة واحدة تخصك
أومأت “هالة” قائلة :
-أنا فاهماك يا خالو.. لكن صدقني أنا فكرت كويس. طبعًا مش سهل عليا أتنازل عن حقوقي و أخرج عن طوع أهلي بالشكل ده.. بس أنا محتاجة أعمل كده دلوقتي. أنا محتاجة أبعد عنهم و أستقل بحياتي.. مش هاسمح لحد يتحكم فيا تاني و يلوي دراعي. أنا اتبهدلت في الفترة الأخيرة أوي و كلهم باعوني كأني و لا حاجة بالنسبة لهم.. و قبل ما تعترض تاني أنا عارفة إنك تقدر تساعدني و تقف جمبي منغير حاجة. لكن أرجع و أقول أنا عايزة أعتمد على نفسي. عايزة تبقى ليا حياتي الخاصة أنا إللي أخد القرار و مابقاش الطرف الأضعف في أي وضع أكون فيه… ياريتك تفهمني يا خالو !
