مريم 2

-نعم يا خالو ! .. تمتمت بتعبير مبهور ينم عن عمق استغراقها في اللا وعي لمدةٍ طويلة

نظر لها “نبيل” بريبة قائلًا بصوته القوي :

-مالك يا هالة ؟ إنتي كويسة ؟!

أومأت “هالة” و هي تقول بهدوء :

-آها يا خالو طبعًا.. I’m fine

نبيل بتشكك : أومال إيه الحالة إللي إنتي فيها دي !!

-حالة إيه ؟

-من ساعة ما ركبتي معايا و إنتي ساكتة و مسهمة طول الطريق.. في حاجة و لا إيه ؟؟

نفت “هالة” على الفور :

-مافيش لأ.. هايكون في إيه يعني ؟ أنا بس يمكن بفكر شوية في إللي هايحصل بعد الخطوة الجريئة إللي أخدتها إنهاردة

نبيل بحزم : هايحصل كل خير يا حبيبتي. أنا مش عايزك تفكري في حاجة أساسًا. طالما كلمتيني و فوضتيني يبقى سبيني أنا أتعامل و أتصرف في كل حاجة لوحدي

أجفلت “هالة” و هي تقول بقلقٍ :

-هاتعمل إيه يا خالو ؟!

-هاجبلك حقك ! .. قالها “نبيل” بثقة، و أردف بصوت أجش :

-هاربيلك عيلة البحيري دي.. واحد واحد و بصغيرهم قبل كبيرهم. كفاية عليهم كده. بلاويهم كترت أوي أصلًا في الآواخر و أنا كان زيي زي الكل بقول أنا مالي.. مايخصنيش. لكن إنتي يا هالة تخصيني. لغاية عندك إنتي أتدخل و أتدخل أوي. لا يمكن أسمح لحد فيهم يستغلك أو يستخدمك لأي غرض كان.. من هنا و رايح أنا فوق راسهم

كانت “هالة” تشحب بالتدريج، إلى أن فرغ “نبيل”.. فأرتفعت يدها إلى فمها و أخذت تعض على أصابعها لا شعوريًا و هي تقول :

-يعني إنت كده خلاص هاتروح القصر ؟؟؟

نبيل متبسمًا بلؤم :

-طبعًا هاروح.. هاسيبك و أطلع دوغري على هناك

-كله بالسرعة دي !!!

نبيل و هو يهز كتفيه :

-إيه إللي يخليني أستنى ؟ بقى ليا رجل هناك.. مش بس هناك. في الشركة كمان

إبتلعت ريقها بصعوبة و هي تحدق فيه عاجزة عن الرد… ليقول تاليًا و هو يرفع كفه ليحتوي جانب وجهها :

-أنا مش عايزك تفكري كتير أو تقلقي من حاجة.. أنا بقيت في الصورة. يبقى تطمني خالص.. محدش هايقدر يدوسلك هلى طرف طول ما أنا موجود. كل إللي هايعوز منك حاجة غصب عنه هايجي يقف قدامي أنا الأول. و أنا بقى هاعرف شغلي كويس مع الكل.. ماتخافيش

ثم دس يده الأخرى بجيب سترته… و أخرج سلسلة مفاتيح ذهبية و ناولها إياها قائلًا :

-دي مفاتيح الشقة و عربية صغيرة كده جبتهالك و حطتها في جراج العمارة. عشان لو حبيتي تتحركي في أي مكان أو تنزلي تتمشي و تشمي هوا. زي ما إنتي شايفة أخترتلك مكان مميز و جميل و كمان بيطل على البحر. إنتي أساسًا بتحبي سان ستيفانو مش كده ؟