مريم 2

رفعت “سلاف” عيناها متطلعة إلى وجهه ذي التعابير الجادة، أخذت نفسًا عميقًا من أسفل النقاب و أجابته بهدوء :

-ماحصلش حاجة يا حبيبي. زي ما الراجل قالك.. مش عامل حسابه يتأخر و لازم يرجعوا بسرعة

أدهم بعدم اقتناع :

-بس كده ؟ إيه إللي حصل قبل ما أطلع ؟ إيه أصلًا إللي طلعك مع مراته تقفوا هنا ؟؟؟

تأففت “سلاف” و قالت بضيق :

-أدهم إنت بتحقق معايا ليه ؟ أنا هاخبي عنك حاجة مثلًا !!!

-أنا ماقصدتش كده ! .. تمتم “أدهم” مجفلًا، لكنه عاد ليقول بحيرة :

-بس إللي حصل غريب.. طيب ممكن تقوليلي إيه إللي طلعكوا هنا ؟!!

سلاف بنفاذ صبر :

-الست كانت مضايقة و شوية و كانت هاتعيط جوا قدام الناس. خدتها و طلعنا تشم هوا و تفضفض.. جوزها منه لله منغص عليها حياتها و قاهرها و هي لا بتهش و لا بتنش

حملق “أدهم” فيها بقوة قائلًا :

-الراجل سمعكوا و إنتوا بتتكلموا عليه ؟؟؟

لقلقت “سلاف” و هي تتهرب منه بنظراتها :

-لأ ماظنش إنه سمع حاجة يا أدهم.. و بعدين إنت مكبر الموضوع ليه مشيوا خليهم يمشوا براحتهم. إحنا كده كده هانزورهم قريب

فغر “أدهم” فاهه قائلًا :

-نعم ! نزور مين ؟!!

-أنا وعدت سمر نعملهم زيارة قريب في بيتهم إن شاء الله

-في إسكندرية ؟!!!

-أيوة يا أدهم.. بعدين بعدين أبقى أحكيلك على التفاصيل دي. يلا دلوقتي ندخل مايصحش نسيب ضيوفنا كده !

و تركته موّلية إلى الداخل، بينما يظل بمكانه محدقًا في إثرها دون أن يتخلى عن آثار الدهشة المستبدة به كليًا ….

°°°°°°°°°°°°°°°°°

بجوار جسرًا نيليًا مضاء بالمصابيح الملوّنة.. اختار “عثمان” مكانٍ جانبي قليلًا خالٍ من الناس، و فرمل سيارته فجأة

أطلقت “سمر” شهقة قوية عندما ارتطمت بمقعدها بعنف، لولا حزام الأمان لكانت طارت عبر الوجهة الأمامية للسيارة …

لم تكد تلتقط أنفاسها من أثر المفاجأة المفزعة، لتسمع صوت زوجها من جانبها ينطلق بلهجة خفيضة لا تخفي غضبه المشحون أبدًا :

-عشان كده وافقتي تيجي معايا رغم كل إللي عملته معاكي اليومين إللي فاتوا.. عاجباكي مدام سلاف يا سمر ؟ ده أنا إللي طلعت غبي. و قال إيه مطمنلها و مآمن عليكي معاها.. أتاريها بتشحنك ضدي !!!

تجمّدت “سمر” مكانها، لا تدري كيف تتصرف أو بِمَ ترد حتى ..

تفاقم شعوره بالحنق مع استمرار صمتها المثير للأعصاب، فامتدت يده نحوها و قبض على ذراعها ليديرها صوبه صائحًا :