مريم 2

-لأ لأ أنا كويسة. صدقني ! .. و ابتلعت ريقها بصعوبة، ثم قالت بلهجة كافحت لتبدو طبيعية :

-بس كنت عاوزة أتكلم معاك في موضوع كده. لو فاضي !

عثمان بجدية : يا حبيبتي لو مش فاضي أفضالك.. موضوع إيه موضوع يخصك يعني ؟!!

هزت “فريال” رأسها سلبًا و قالت :

-لأ.. يخصك إنت !

نظر لها لبرهة… وأعتقد بأنها ربما تود أن تحدثه بشأن زوجته و ما فعله معها منذ قليل… فتنهد بعمق و قال بفتورٍ :

-أوك يا حبيبتي.. أنا طبعًا عندي استعداد أقعد معاكي و نتكلم للصبح في إللي إنتي عايزاه. بس طالما الموضوع مايخصكيش إنتي إسمحيلي نأجله لبكرة الصبح بس. عشان أنا يدوب أحضر نفسي !

و رفع معصمه العريض لُيلقي نظرة بساعته الضخمة …

-تحضر نفسك لإيه ؟ .. سألته “فريال” بفضول

نظر لها مجددًا و قال بصوتٍ هادئ :

-مشوار كده للقاهرة و راجع في نفس اليوم.. فرح مراد يا فريال هانم. و إحتمال أخد معايا سمر !

-سمر !! .. تمتمت “فريال” رافعة حاجبيها

لكنها ما لبثت أن قالت مستحسنة صنيعه و مشجعة إياه :

-طيب دي حاجة كويسة أوي. ياريت و الله. خدها و روحوا فعلًا.. فرصة تصفوا إللي بينكوا كله

أومأ لها موافقًا و قال :

-أيوة.. بس يارب هي توافق. أنا مش هاضغط عليها. لو قالت لأ من أول مرة خلاص

طمأنته “فريال” بلطفٍ :

-إن شاء الله هاتوافق.. و هاترجعوا متصالحين و زي الفل يا حبيبي. بس إنت ماتقساش عليها يا عثمان. البنت دي بتحبك بجد

-أنا عارف يا ماما. عارف ! .. و أضاف مبتسمًا :

-أول ما أرجع هاجيلك.. ماتقلقيش مش هانسى !

_______________

يصل “فادي” إلى المنزل في موعده عند المغيب.. كان محملًا بالأغراض كعادته… دق الجرس مرارًا

لكن زوجته لم تستجيب.. فوضع الأكياس أسفل قدميه ليستخدم مفتاحه الخاص… و بالفعل فتح و قام بإدخال الأغراض، ثم اغلق الباب خلفه و هو يصيح مناديًا :

-هــالة.. هـــالة.. يا هـــالة !

لكنها أيضًا لم تستجيب …

-نايمة دي و لا إيه !! .. تمتم “فادي” لنفسه

إتجه من فوره نحو غرفة النوم و هو يهتف :

-إيه يا هالة معقول نايمة لحد دلوقتي من ساعة ما سيبتك ؟ إيه النوم ده كله يا حبيبتي إحنا بقينا المـ آ ا …

بتر عبارته فجأة ..

حين ولج إلى الغرفة لترصد عيناه خزانة الملابس مباشرةً… حيث إنهالت عليه الصدمة.. عندما رآها مفتوحة على مصراعيها و فارغة تمامًا.. إلا من ثيابه و أغراضه هو فقط