خطايا برئيه ٦
خطايا برئيه ٦
-متعتذرش دي حاجة مش غريبة عليك طول عمرك كده ومش هتتغير
وإذا كان على القضية انا اتنازلت علشان انا مش قليلة الأصل زي ما حضرتك فاكر ولا مؤذية وعلشان مهما عملت هتفضل أنت أبو ولادي اللي شايلين اسمه ومش عايزة يعاتبوني في يوم من الأيام إني سجنتك.
زفر انفاسه دفعة واحدة وهو يطفئ سيجارته في المنفضة التي تعتلى المنضدة ثم نهض يقترب منها بخطوات حثيثة قائلًا بعتاب وبنظرات ملتاعة معاتبة تفضح اشتياقه لها:
-علشان خاطر الولاد بس! …للدرجة دي يا “رهف” كرهتيني ومبقاش ليا حاجة جواكِ طب إزاي وديتي حبك الكبير ليا فين؟
وخزة قوية من الألم انتابة قلبها حين اجابته بثقة:
-مبقاش ليك حاجة جوايا خلاص يا بشمهندس انت دلوقتي ابو ولادي وبس
قالت جملتها بثقة استغربها كثيرًا، فمن تلك و أين “رهف” خاصته الحائرة التي كانت تستجدي حبه!
لم يفكر بالأمر حين وجد ذاته يقترب منها قائلًا بحسره وبعتاب ليس بمحله بتاتًا:
-يااااااه بالسهولة دي يا “رهف” ده حتى اسمي مش عايزة تنطقيه!
اسمي اللي كان بيطلع من بين شفايفك بحب ويرشق في قلبي وعمري ما حسيت بحلاوته غير وهو طالع منك أنتِ…
ارتعش فمها، ولم تجيبه وظل رأسها شامخ تطالعه بثبات رغم هشيم قلبها وذلك الجرح الغائر الذي مازال ينبض بالألم بفضل أفعاله، مما جعله يقترب بتردد يحاول أن يؤثر عليها كما كان يفعل بلمساته التي كانت تذيبها فقد حاوط ذراعيها وأسبل عينيه هامسًا بنبرة ملتاعة تفيض بالاشتياق لم تتأثر بها:
-“رهف” أنا اعتذرت مرة واتنين بس انتِ مش عطياني فرصة حتى ادافع عن نفسي أنا مش عارف اعيش من غيرك وحاسس أن حاجة كبيرة ناقصاني…
نظرت له نظرة محملة بالكثير من خيبة الأمل ولم تعطيه مجال ليكمل حديثه حتى فقد انتفضت كالملسوعة من لمسته وصرخت به بشراسة لم تكن ابدًا من طباعها:
-إياك تفكر تلمسني انت فاهم …
لتثور انفاسها وتسترسل وهي تستغرب كيف يتقرب منها ويخبرها بإشتياقه لها بعد ذلك العرض السخي الذي أوكل خالته به:
-انت انسان متناقض مش طبيعي…
زمجر غاضبًا وهو يشعر بقهر من تغيرها المبالغ به، ويستغرب بشدة ما اصبحت عليه ف “رهف” خاصته التي كانت تتمرمغ به مثل القطط الآن تنفر منه ولا تطيق لمسته:
-” رهف” انا مش متناقض أنتِ لسة مراتي وعلى ذمتي ولو على الكلام اللي قولته لخالتي فأنتِ اللي اضطرتيني لكده رفضك ليا وجرحك لكرامتي كل ما اجيلك
