خطايا برئيه ٦

نفضت “ميرال” يدها بعصبية وقالت بقلب منهك ذاق الخذلان على يدها:
-أنتِ فعلًا لعنة…أنا كنت بحبك وكنت فاكرة أننا هنكمل بعض وأن قلبك هيبقى عليا بس انتِ خذلتيني وبوظتي حياتي

قالتها بأنهيار تام وهي تجثو على ركبتيها على الأرض الترابية ودمعاتها تهطل كشلال مياهه لا تنضب وهي تخفي وجهها بكفوف يدها…مما جعل الآخرى تؤاذر أنهيارها بأنهيار مماثل وتجثو مثلها مغمغمة بندم قاتل يفتك بها:
-ربنا بيسامح…انا ندمت والله ندمت وهعمل المستحيل علشان اصلح كل اللي عملته…سامحيني سامحيني…انا هروح لحبيبك وهقوله على كل حاجة وهو اكيد هيصدقني

نفت “ميرال” برأسها وقالت بيأس من بين شهقاتها:
-مش هيصدق…”محمد” دماغه ناشفة وكبريائه وعزة نفسه مش قابلة يكون للبنت اللي بيحبها علاقات قبليه… هو بيحاسبني على المبادئ والقيم وانا مليش ذنب يروح يحاسبهم هما يحاسب الست اللي رمتني ويحاسب ابويا اللي معندوش وقت ليا، يروح يحاسب “دعاء” انها بتمثل دور مرات الأب اللي قلبها عليا قدام ابويا ومن وراه بتكهرهني ونفسها تخلص مني انا بشوف ده في عينيها وعارفة انها عمرها ما حبتني ولا حتى حبت ابويا واتجوزته علشان طمعانه فيه بس انا كنت بسكت علشان شيفاه مرتاح…”محمد” بيحاسبني على حاجات انا معرفهاش ولا عمري اتعلمتها…وهو مقتنع أن في فوارق كتير بينا وعلشان كده مش هيصدقك…

نفت” نادين” برأسها وحفزتها قائلة وهي تضغط على ذراعيها:
-هيصدق…لو راجل بجد زي ما بتقولي يبقى هيصدق وحبه ليكِ هيخليه يتخطى أي فوارق
اجابتها بيأس و بواحدة من تلك القناعات التي زرعها بها مالك قلبها:
-الراجل اللي بجد يا “نادين” بيغفر كل حاجة إلا المساس بكبريائه وعرضه وخصوصًا لو كان الموضوع يمس البنت اللي اخترها تشيل اسمه وتبقى أم ولاده.

-بلاش نسبق الأحداث وإن شاء الله كل حاجة هتتصلح بس اجمدي علشان خاطري انا محتجاكِ جنبي زي زمان…وهنا وهن صوتها واعتصر قلبها وهي تستأنف برعب من بين نحيبها:
-انا خايفة يا “ميرال” خايفة… زي ما خسرتك زمان اخسر “يامن” أنا بحبه يا “ميرال”…بحبه وعارفة انه مستحيل هيسامحني

-أنتِ لازم تقوليله الحقيقة قبل ما الحيوان ده يعمل حاجة…لازم تتشجعي وتحكيله وطالما بيحبك هيقف في وشه ويبعده عنك