شبح حياتي ج الاخير

بتر جاسر باقي جملتها ليقول بابتسامة تشوبها الصبر يحاول ردع عنادها بألطف الطرق : اسمعيني روحي البيت و الصبح ارجعي حتي عشان تغيري هدومك وتستريحي شوية .. كدا كدا مش هتعرفي تشوفيه لحد الصبح يعني القعدة هنا مالهاش داعي

قوست حياة شفتيها ، وتحدق فيه بعدم رضا ، لترد بتذمر : ماينفعش نسيبو تاني لوحده…

ابتلعت حياة بقية اعتراضها الواهى من شدة إجهادها ، حالما وصل صوته ذو بحة المميزة إلى أذنيها من خلفها : انا هوصلك يا حياة

التفتت نحو معاذ مغمغمة باستسلام ، وإطمئن قلبها قليلا من بقاء جاسر في المستشفى : طيب

★•••••★•••••★•••••★•••••★•••••★•••••★•••

في سيارة معاذ

حدق بها خلسة ، ليراها عاقدة يديها إلى صدرها في سكون ، وبدا أنها غارقة في أفكارها لبعيد ، حتى استفاقت على صوته حينما حاول جذب أطراف الحديث معها بنبرة لينة ، بينما بصره مرتكزًا للأمام : شكلك لسه مضايقة مني عشان الكلام اللي قولنا اخر مرة .. الضغط اللي كنت فيه خلاني اتصرف كدا بس انا ماكنش قصدي اتعصب عليكي

تكلمت حياة بحدة ، وهى ترمقه بنظرات جانبية فورًا أدرك معناها : عادي يا معاذ دا طبعك و مش هيتغير في يوم وليلة .. انت علي طول متسرع و لسانك سابق تفكيرك

زاد من قوة قبضته على عجلة القيادة ، حانقًا على نفسه ، كيف يمكنه أن يلومها ، لقد كانت تلك المشكلة دائمًا ، من الصعب عليه كبح جماح غضبه السريع ، لكنه حاول ضبط نفسه بتحكم لاذع للرد في أهدأ نبرة يمتلكها : عندك حق يا حياة .. يمكن سبب عصبيتي معاكي عشان كان لسه جوايا امل اننا هنتصالح ونرجع لبعض .. وماكنتش متقبل ان في حد تاني في قلبك

ارتخت ملامحها الحادة ، وهي تلتمس الندم في عبارته ، ثم تنهدت قائلة بنبرة رقيقة : مش نصيبنا نكون مع بعض يا معاذ .. لو كملنا كنا هنفشل عشان ماكناش هنقدر نتفاهم مع بعض ولا كنا هنريح بعض

ابتسم معاذ ابتسامة جانبية مليئة بالمرارة ، وأومأ برأسه ، وتابع حديثه بضيق : جايز .. وانا مقدر صراحتك معايا .. واكيد مش هفرض نفسي عليكي .. لا كرامتي ولا رجولتي تسمحلي اجبرك عليا او اخليكي تحبني غصب عنك

هزت رأسها بصمت حينما ألقي نظرة خاطفة عليها مزدردًا ريقه ، و يجز على أسنانه بقوة ، محاولًا التحكم في انفعالاته ، مضيفًا نفس الطبقة الصوت الهادئ : عشان محدش بيحب حد غصب عنه يا حياة .. بس احنا قرايب قبل كل حاجة و هفضل موجود اذا احتاجتي اي حاجة