شبح حياتي ٢

سألها جاسر بترقب : قالك ايه؟

أستطرد بدر قائلا بصوت هادئ ومتزن : ابويا اتجوز والدته في السر عشان كان بيحبها جدا .. بس كان بيحب نفسه اكتر خصوصا مركزه للي كان بيخاف اي حاجة تأثر عليه حتي لو كانت حبيبته ومارضيش يعترف بالولد .. عشان وقاره قدامنا انا و امي و العيلة كلها ما يتهزش .. اختار انه يظلم مراته التانية وابنه الصغير عشان يحافظ علي كبريائه ويتجنب فضايح الجرايد للي لو شمت خبر هتتهد الدنيا فوق دماغه .. لان امي كانت بنت راجل له نفوذ عشان كدا وقتها ام جاسر كتبت جاسر بإسم أبوها ورفضت تشوف ابويا من ظلمه ليها لحد لما ماتت امه من كتر حزنها وجاسر اتربي مع خاله .. ماعرفتش ان ليا أخ الا قبل ما ابويا يموت بأيام دورت عليه لحد ما وصلتله .. رفضني مرات كتير كل ما احاول اكلم معه بس بعد كدا فتح باب قلبه ليا ..كان هو في ثانوية عامة واصر يدخل حقوق عشان يساعدني و يكون معايا .. لكن فضل رافض انه يغير اسمه لكن وافق في الاخر عشان ماكنش ينفع يستلم ميراثه من بابا قبلها وكان شرطه عشان يشتغل معايا ان محدش يعرف بكل دا و يفضل يستخدم اسمه القديم

كانت حياة تسرد الكلمات التي قالها بدر دفعة واحدة ، تردد بصوتها الذي إزداد ثبات وثقة بعد أن رأت الصدمة والصمت من جاسر الذي كان ينصت لها باهتمام شديد ، ولم يرغب في مقاطعتها.

قاومت بشدة الصدمة التي سيطرت عليها أيضًا ، حيث ظهر احمرار شديد في عينيها نتيجة حبس دموعها ، وحالة جاسر لم تقل سوء عنها بسبب فتح جروحه من جديد لانها لم تلتئم تماماً ، وقد بدأ بالفعل بعد الكلمات الأولى يصدقها وإنتظرها حتى تنتهي من حديثها قائلا بذهول : مش مصدق ان بدر وثق فيكي لدرجة انه يحكيلك .. حتي مراته ماتعرفش اي حاجة!!

عضت حياة شفتيها بتردد ، وهي تنظر إلى بدر من زاوية عينها ، ثم قالت بترقب : استاذ جاسر ممكن اقولك علي حاجة تانية وتصدقني!!

أومأ لها جاسر بصمت حتى تواصل حديثها.

حدقت حياة به بهدوء ، بعد أن رفعت أنفها باعتزاز وثقة رنت في صوتها ، دون أن تمهد لما ستقوله : بدر طلق اميرة قبل ما يختفي

اتسعت عيناه بدهشة عارمة ، وسألها بعقل حائر : نعم .. ازاي طلقها!!؟

رفعت كتفيها كدليل على جهلها بالإجابة ، وقالت وهي تحدق في بدر الصامت منذ دقائق ، بعد أن أعطاها غمزة تدل علي أن زمام الأمور بيدها : ازاي انا معرفش تفاصيل بس انا متأكدة من المعلومة دي