شبح حياتي ٣

لفت حياة عينيها بملل ، لتقول ساخرة : يعني معاذ ماقالكيش؟

هزت ميساء رأسها نافية ، وأجابت على الفور : قالي انك هنا وبس .. جيت علي طول انا وحازم بس هو راح يشوف معاذ

خفضت حياة جفونها ، وعقدت ذراعيها على صدرها وقالت بخفوت : بدر عامل حادثة وموجود هنا في المستشفي دي

اتسعت حدقتى ميساء بتفاجئ ، وهمست بلا استيعاب وقد الجمتها الصدمة ثوانٍ : بدر عز الدين!!

رفعت حياة رموشها الكثيفة ، ونظرت إليها للحظة ، ثم أجابت بحزن : اه في غيبوبة هنا من اسبوعين ومحدش كان عارف مكانه

تساءلت ميساء بتوجس ملئ بالحذر : وانتي ايه علاقتك ببدر .. مش فاهمة..؟

قاطعت حياة كلامها قائلة بيأس : ولا هتفهمني يا ميساء

بعد فترة من الصمت ، سألت ميساء بإلحاح : لازم تقوليلي جيتي لحد هنا عشان بدر ليه!!؟

تجاهلت حياة سؤالها ، لتقول بنبرة خافتة مليئة بالانزعاج دون النظر إليها : مش قادرة اتكلم دلوقتي يا ميساء كفاياكي اسئلة و تحقيق معايا .. انتي عرفتي اني هنا خلاص ارتاحي بقي

تنهدت ميساء بخفة ، وتمتمت بابتسامة محاولة تلطيف الجو بينهما : مش هستريح الا لما تروحي معانا البيت

هزت حياة رأسها احتجاجًا ، وقالت بإصرار : انا مش همشي من هنا يا ميساء .. انا جاية عشان بدر وهفضل معه

عقدت ميساء حاجبيها مستنكرة ما قالته ، وهتفت بحدة : لا كدا انتي اتجننتي وعايزة تجننيني معاكي .. تعرفي بدر دا منين اصلا وعلاقتك بيه ايه؟

ظلت حياة تحدق بها بصمت ، وتفكر بما ستجيب لكن الصمت طال ، ولم تقل شيئاً فلم يكن لديها جواب.

الفصل السابع عشر شبح حياتي

تجنب الحديث أثناء الغضب⁣⁣ ، قد يكون كلامك صحيح⁣⁣ ، لكن حتماً أسلوبك خاطئ⁣⁣.

ــــــــــــــــــــــــــــــــــــــــــــــــــــــــــــــــــــــــــــــــــ

مر الوقت دون أحداث ، وأتى المساء سريعا وانجلى القمر بدرًا.

استدار مازن نحو حياة ، وهو يحمل بين يده كيسًا صغيرًا يحتوي على شطيرة ، بعد أن قدم إلى ميساء فنجانًا من القهوة ، متحدثًا مع الأولى بلطف بالغ : اتفضلي يا حياة .. انتي ماكلتيش حاجة من الصبح .. اختك اجدع منك كلت وبعدين شربت قهوة .. كفاياكي انتي شرب قهوة من غير اكل..

رفعت حياة بصرها نحوه ، وحدقت فيه بذهن شارد ، ومنحته ابتسامة لطيفة لتقول بامتنان ، متجاهلة ما قاله منذ لحظات : شكرا يا دكتور مازن .. انت تعبت معانا من امبارح و مانمتش حتي .. تقدر تسافر عشان ماتعطلش شغلك