رواية على الرقاب قدر نافذ الكاتبة شاهندة الجزء 3

إرتمت (نوار)فى حضن امها وهي تبكى بحرقة،لتربت والدتها على ظهرها قائلة من وسط دموعها التى سقطت بدورها:
-لا حول ولا جوة إلا بالله،لا حول ولا جوة إلا بالله..إبكى يابتي وخلى دموعك كيف المطر تغسل سواد همك وبدنك ،وتحيي جلبك كيف مابيحيي المطر الأرض،وإرفعى يدك وإدعى من جلبك ،لعلها تكون ساعة إجابة.

لتغمض( نوار) عيناها وقلبها يبتهل بكل الدعوات بينما يؤمن قلب (زبيدة) وهي تطلب الغفران من الله قائلة بصمت:
-سامحنى يااااااارب.

_____________

قالت (فضيلة)بمرارة:
–بجولك كان بيناديها فى منامه،انا مبجتش جادرة أتحمل يابدارة،عجلى هيشط منى وجلبى جايد نار.

قالت(بدارة)بحرقة:
-ومين سمعك ياخيتي،كنها ساحرالهم بنت المحروجة دى.

لتلمع عينا (فضيلة)وهي تقول فجاة:
-لجيتها.

إنتفضت (بدارة)قائلة بجزع:
-هي إيه اللى لجيتيها دي؟خرعتيني ياولية.

أمسكت (فضيلة )بيد (بدارة)قائلة:
-لجيت الحل للمصيبة اللى هبت علينا من بلاد برة دى.

عقدت( بدارة ) حاجبيها قائلة:
-حل إيه ده؟

قالت (فضيلة):
-عنسحرلها،نجاة بنت خالى ،كان جوزها مش طايجها وساجيها المر كاسات،راحت لشيخة إسمها عوالي ،عنديكم فى كفر هوارة،خليته كيف الخاتم فى صباعها،وشايفة الهنا كله منيه دلوكيت.

قالت (بدارة)بإستنكار:
-واه ،إتجنيتي إياك،سحر إيه وعوالى إيه ؟حد الله مابينى وبين الحرام،ده غير إنى مكوية بناره ..

لتشير لشعرها مردفة:
-وآدى الدليل كدامك،لع يافضيلة،إتجى الله،إحنا مش ناجصين مصايب.

قالت(فضيلة):
-مصايب إيه يامخبولة إنتى؟وهو فيه أكبر من المصيبة اللى حاطت على راسنا دى عاد،إسمعى الحديت اللى عجولهولك ده،إحنا نلجأوا لعوالي دى،ونطلبوا منها تبعد المرة دى عن إجوازتنا من غير ضرر ولا شر،بس إكده،مفيهاش حاجة عفشة تخليكى تجلجى منيها..

إنتفضت تلك التى كانت تستمع إلى حديثهما من خلف الباب على صوت زوجها يقول بإستنكار:
-واجفة كدة ليه يازهرة؟

اشارت له بالصمت وهي تتقدم منه وتسحبه من يده ،تدلف إلى حجرتهما وتغلقها جيدا ثم تستدير وتواجهه قائلة:
-مصيبة ياأخوي ،مصيبة عتجع على راسنا كلياتنا.

عقد (محمد)حاجبيه قائلا:
-باه،مصيبة إيه دى؟ماتنطجى علطول يازهرة،وجعتى جلبي.

قالت (زهرة):
-عجولك ياخوي،عجولك.

الفصل الثامن عشر

___أحبني كالوطن___

قال(محمد)بعيون إتسعت إستنكارا:
-عتجولى إيه يازهرة؟مرت أخوي وخيتي عيتفجوا على مرة بريئة ملهاش ذنب وعيسحرولها كمانى؟