رواية على الرقاب قدر نافذ الكاتبة شاهندة الجزء 3
رواية على الرقاب قدر نافذ الكاتبة شاهندة الجزء 3
_______________
في روما …
دلف (رحمان) إلى حجرة مكتب أبيه لينهض الأخير قائلا بلهفة:
-ها ،وصلت لحاجة؟عرفت راحت فين؟
قال (رحمان) بحنق:
-دوختني معاها وكأنها المرأة الحديدية اللي مش هعرف أطلع منها إجابات أسئلتي مهما عذبتها،منطقتش غير لما هددتها بإني هموت حبيبها جون ،وقالتلي إن الهانم راحت على أسوان راحت لأهل مامتها هناك.
إمتقع وجه (توفيق)وجلس قائلا:
-راحت عند همام وعويس،يبقى روحنا بلاش يارحمان.
عقد (رحمان)حاجبيه قائلا:
-قصدك إيه يابابا؟
قال(توفيق):
-انت متعرفش عيلة الجبالي دى عاملة إزاي دول مفيش عندهم رحمة وكلامهم بالسلاح والدم هنجيبها من هناك إزاي بس؟
قال(رحمان):
-بسيطة ..هننزل البلد وهنروحلهم هناك، هقولهم إني عايز خطيبتي وإنهم لازم يرجعوهالي.
قال(توفيق):
-إنت مخلول إياك؟
طالعه (رحمان)بدهشة،يدرك أن أباه الآن في قمة غضبه حيث تتحول لهجته تلقائيا ويعود إلى أصله،ليقول بصوت وجل:
-ليه بس يابابا؟
قال(توفيق):
-انت عارف لو همام أو عويس عرفوا إننا قتلنا أختهم هيعملوا فينا إيه؟هيموتونا بطريقة عمرك ماسمعت ولا هتسمع عنها .
قال(رحمان)بخوف:
-وهو إيه بس اللي هيعرفهم ؟
قال(توفيق):
-المحروسة خطيبتك.
قال(رحمان):
-وهي هتعرف منين بس؟
قال(توفيق) بحنق:
-ماهي أكيد عارفة،أمال بتهرب مننا ليه يافالح؟
قال(رحمان):
-لأ إطمن متعرفش ،فيفيان قالتلي إنها بتهرب عشان مش عايزة تتجوزني مش طايقاني يعني ومعتقدش إن فيفيان ممكن تكدب وهي عارفة اني ممكن أقتل حبيبها،يبقى نطب على البلد وأطالب بيها،وحتى لو رافضة فأعتقد إن قانون بلدنا إن البنت لإبن عمها واللي بتتحامى فيهم دول هم بنفسهم اللي هيغصبوا عليها تتجوزني ولا إيه رأيك يابابا؟
ظهر التفكير على (توفيق)للحظات قبل أن يرفع عيناه إلى ولده قائلا بإبتسامة:
-عفارم عليك يارحمان،معاك حق طبعا،أنا هبعت حد البلد يشوف الأخبار ،ولو كله تمام يبقى هنسافر ونعمل كدة،أما لو الحال معجبناش فبناقصها الجوازة دى وربك يعوض علينا بقى.
قال(رحمان) بثقة:
-بكرة تشوف إن إبنك كان معاه حق وإن مرواحتنا البلد هتبقى في صالحنا مية في المية.
هز (توفيق)رأسه وهو يقول:
-هنشوف يارحمان…هنشوف.
_______________
في المستشفى…
قال (مهران) لأبيه:
-خلاص ياأبوي ، غمة وإنزاحت ،ناجي مع عمتي بيخلصوا إجراءات الإفراج عنيها وعيطلعها بإذن الله.
