سبر أغوار قلبي ٢

أماءت إيماءة صغيرة برأسها و هى مازالت شاردة ثم قالت لمارى التى كانت تنام على نفسها : مارى وصلى أستاذ أدهم .. قام أدهم و خرج من غرفة الصالون لتتبعه مارى .. أما هى فظلت جالسة فى مكانها دون حراك .. نظرت للشباك الكبير المطل على مدخل الفيلا لتجده ذاهباً .. ظلت تنظر له إلى أن اختفى تماماً من أمامها !

أتت مارى و قالت بتساؤل : اساعد حضرتك يا تالا هانم عشان تروحى تنامى ؟

ابتسمت تالا و قالت بجدية : لا يا مارى روحى نامى انتِ .. أنا هستنى صلاة الفجر ثم قالت بتساؤل : أمال فين زينب ؟

مارى بجدية : قعدت تستنى حضرتك لحد ما نامت .. ثم اردفت بتساؤل : أصحيها لحضرتك ؟

تالا بجدية : لا ملوش لزوم .. روحى نامى

غادرت مارى لتعود تالا بذاكرتها للوراء .. تتذكر أيامها مع ماجد

Falsh Back

كان أخر يوم تقضيه فى الساحل .. كانت جالسة بغرفتها و علامات الإنزعاج و الحزن يغيم على وجهها فإنها ستسافر إلى القاهرة و ربما ستنقطع علاقتها مع ماجد الذى استطاع ان يخترق قلبها من أول نظرة دون عناء يذكر .. دخلت أمها عليها و قالت بتساؤل : تالا حضرتى الشنط ؟

نظرت لها تالا بضيق و قالت : لا لسة ؟ .. أنا مش عايزة اسافر .. سافروا انتو و انا هقعد هنا

أمها بانفعال : انتِ مجنونة يا تالا .. ازاى نسافر و نسيبك قاعدة لوحدك

قامت تالا و وضعت يدها على كتف أمها و قالت بجدية : خليكى اسبور يا روفيدة .. ثم قالت بسخرية : و بعدين انتِ خلصتى خناق مع بابا قولتى تيجى تتخانقى معايا أنا

روفيدة بانفعال: ما انتِ اللى بتقولى كلام مستفز و ميصحش .. ازاى يعنى أسيب بنت لوحدها

رن هاتف تالا .. فأغلقت على المتصل ثم اقتربت من أمها و قبلتها من وجنتها و قالت : خلاص هدى نفسك .. أنا هخرج أتمشى شوية ثم تركتها و خرجت دون أن تسمع ردها

نادت عليها روفيدة و هى تقول بحدة : تالا استنى .. مين اللى هيرتب هدومك و يجهز الشنط

سمعت صوت تالا من الخارج و هى تقول بصوت بعيد : انتِ يا حبيبتى ثم خرجت من الشاليه .. لتذهب روفيدة و تقف على باب الشاليه و تقول بصوت عالى : تالا .. تعالى غيرى هدومك دى و بعد كده ابقى اخرجى .. هتخرجى باللبس ده

نظرت تالا للبرمودة الزرقاء التى تصل إلى ركبتها والبادى الأبيض ذو الحمالات العريضة برضا و قالت بعدم اهتمام : أيوه ماله لبسى .. مهو حلو أهو .. ثم أردفت بضيق : فكك منى بقى دلوقتى و ابتعدت قبل أن تعطيها أمها محاضرة من محاضراتها التى تعتبرها سخيفة للغاية