شبح حياتي ١

شهقت حياة خوفاً من غضبه ، لكنها حاولت الحفاظ على رباطة جأشها قائلة بسخرية لطيفة : وعايز مني ايه يا اونكل بدر!؟

تمتم بدر فيما استقرت نظرته على شفتيها المقوستين بلطف : زي ما شوفتي كدا محدش بيشوفني غيرك

ابتسمت حياة ببلاهة ، وكأنها قد جن جنونها بالفعل ثم همست وهي تميل قليلاً بجسدها في إتجاهه : يعني زي ما انا قولت عليك انت عفريت

قام بدر من مقعده ، ثم مشى نحوها شارحاً لها ما كان يحدث له : انا متأكد في سبب للي بيحصل .. انا فضلت ايام كتير جوا شقتي كل ما حد يدخل احاول اتكلم معه مايردش عليا حتي طليقتي .. كنت قربت اتجنن لحد ما لاحظت انك شايفاني و رديتي عليا لما حاولت اكلمك

فتحت حياة فمها بإنشداه ، متسائلة بغرابة : طليقتك مين!! اللي أعرفه انك متجوز

هز بدر رأسه رافضاً ، وقال لها بإصرار : كنت متجوز وطليقتي اسمها أميرة

لم تهتم حياة بهذا الحديث ، وسألته بزمجرة ، وهي تنفخ خديها بحنق : برده انا مالي و مال كل دا

أضافت راسمة تعبيراً توسلياً على وجهها الطفولي ، وهي تشبك كلتا يديها تحت ذقنها : لو كنت عفريت اللي اسمه بدر دا .. ارجوك انصرف من حياتي انا مش نقصاك ابدا

عقد بدر حاجبيه بتفكير ، ثم صاح بقلة حيلة و تردد إنجلى على ملامحه الرجولية : مابقتش قادر .. دا مش بمزاجي انا بتحرك وراكي غصب عني .. انتي الوحيدة اللي وانا معاها مش حاسس اني ميت

غمغمت حياة بصوت خافت بينما حدقتيها العسليتين يهتزون بخوف : ميت!!

رفع بدر رأسه ، ونظر إلى الأعلى ، وتحدث بثقة مصطنعة ، رغم أنه كان خائفًا داخليًا ، لكن هذا كان الاستنتاج الوحيد الذي توصل إليه : مفيش غير التفسير دا قدامي .. اكيد انا موت و محدش يعرف باللي حصلي

★•••••★•••••★•••••★•••••★•••••★•••••★•••

في أحد الشوارع القريبة من عمارة بدر

كانت حياة تسير بخطوات هادئة وكان عقلها مستغرقاً في التفكير ، وبجانبها كان بدر يسير موازيًا لخطواتها.

صاح بدر شاكياً بطء سرعتها : انتي ليه خطوتك بطيئة كدا ومارضتيش تركبي تاكسي ليه!؟

عادت حياة من شرودها إلى الواقع عندما استمعت لسؤاله ، وأجابت ببرود : بحب اتمشي لما بيكون تفكيري مشغول بحاجة

غمغم بدر بسؤال آخر : ماشي .. هتروحي علي البيت؟

تمتمت حياة بحنق من بين أسنانها عندما لاحظت المارة بجانبها ، وهم يحدقون فيها : ممكن تمشي وانت ساكت .. الناس حواليا بتبصلي وانا بكلم مع نفسي