خطايا برئيه ١
خطايا برئيه ١
– طب يا جماعة أنا لازم أمشي ومتقلقيش انا هكون اول الحضور في عيد الميلاد لتميل على إذن “ميرال” هامسة بِخبث تجيده :
-وهجيب الرجعي المتخلف بتاعي معايا علشان أثبتلك العكس
ذلك آخر ما تفوهت به تاركة” ميرال” تلعنها بِسرها و تستشيط غضبًا وتقسم انها سترد لها الصاع صاعين
——————————
لحقت به للغرفة لتجده يتحدث بالهاتف بِصوتٍ خفيض للغاية وما أن رآها توتر وبِسرعة البرق كان ينهي محادثته ، اوقفها الأمر لبرهة عاندت فيها أفكارها وسألته :
– هتتأخر يا حبيبي
هز رأسه وهو يرتدي ملابسه وقال بِتبرير :
– انتِ عارفه انه غصب عني المشروع أخد كل وقتي ولازم يتسلم كمان اسبوعين وخايف ملحقش وادفع الشرط الجزائي
احتضنت ظهره وقالت داعية كي تخفف عنه :
= هتلحق يا “حسن ” ربنا يقويك معلش هانت بكرة ربنا اكيد هيكافئك على تعبك
استدار لها وكوب وجنته الممتلئة قائلًا بأمتنان :
– والله يا قلب “حسن” مش عارف من غيرك ومن غير فلوسك اللي ادتهالي كنت هعمل ايه ….
= انا اللي من غيرك ولا حاجة يا “حسن” ربنا يخليك لينا وبعدين فلوسي هي فلوسك
تنهد بِعمقٍ ومال على وجنتها يقبلها و وعدها :
– أدعيلي يا رهف ….وإن شاء الله اول ما اسلم المشروع هرجعلك كل فلوسك وكمان هعملك كل اللي نفسك فيه
اعترضت هي بكل سلام نفسي :
– انا مش عايزة حاجة غير إني أشوفك مبسوط وبتحقق احلامك، انت أهم عندي من نفسي يا “حسن”
جعد حاجبيه ورفض :
– بس ده حقك يا “رهف” و ورثك من أهلك
عارضته هي بِقناعة وثقة تامة :
– أنا وأنت واحد و في الأخر كله هيبقى لينا ولمستقبلنا كلنا مش كده يا “حسن ”
أجابها بعدما تهللت اساريره وأحتضنها بِقوة :
– كده يا قلب “حسن “من جوة
لترفع رماديتاها وتسأله بتيه يذهب عقله دومًا :
– بتحبني ؟؟؟؟
انتظرت رده ولكن هو لم يجيبها بل فضل أن يؤكد لها بِطريقته التي يجيدها ويظنها أبلغ من الكلام
—————————–
غادرت من بينهم بعد حديث تلك المتعجرفة وهي تستشيط تريد أن تنفث غضبها بأي شيء ، لتصعد إلى سيارتها وتقودها بسرعة جنونية إلى ذلك المكان البعيد اعلى تلك الهضبة التي طالما انفردت بنفسها به ، وما ان وصلت لوجهتها تدلت من سيارتها واستندت على مقدمتها وظلت فيروزاتها شاردة في تلك الإطلالة الرائعة للبلد من اعلى ،و ظلت جملة واحدة هي ما تتردد بِعقلها ( أصلك معدومة الثقة وفاكرة كل الناس شبهك )
