خطايا برئيه ١

=يا ستاااااااار أعوذ بالله

قهقه مرة أخرى وسأله :

– بجد مالك …..حصل جديد ….فضفض انا خِبرة هفيدك

هز “يامن” رأسه بلا فائدة وقال ساخرًا :

– بعد التصريح الخطير بتاعك ده أخاف أفتح بوقي ده انا بفكر أقطع علاقتي بيك يا فلاتي

– بقى كده والله انت اللي خسران وبعدين بطل فلاتي دي هتشبهنا

قهقه “يامن” و عاتبه :

– طالما انت جبان كده وبتخاف من مراتك يبقى تحترم نفسك

نفى برأسه وأخبره ببراءة لا تخص نواياه بشيء:
– مراتي دي ست الناس كلها وعلى راسي ….بس الموضوع مش بإيدي يا “يامن “انت راجل زي وأكيد هتفهمني

= أفهم أيه يا “حسن” مراتك بنت ناس وزي القمر ومش مقصرة معاك في حاجة ده غير انها عندها استعداد تعمل علشانك اي حاجه

تنهد بعمقٍ وسايره بِنبرة غامضة :

– عارف….وعلشان كده مفيش حاجة هتتغير هتفضل هي أم عيالي وعمري ما افرط فيها

تنهد “يامن” ونصحه بتعقل :
– اتقي الله يا” حسن” وارضى باللي اتقسملك ولو مراتك فيها عيب مش عجبك حاول تصلحه وبلاش دناوة

لوح “حسن” بيده وأخبره بسخط:

– ياعم أصلح ايه ولا ايه؟
وبعدين وفر نصايحك انت عارف أن دماغي جازمة ومش هعمل غير اللي انا عايزه

ليصيح” يامن” بِقلق :
– والله انا خايف دماغك دي توقعك في شر أعمالك و تخليك تندم و تقول يارتني

ليرفع” حسن” حاجبيه بِخبث ويصرح وهو يهندم ياقة قميصه بغرور :

– لا متقلقش صاحبك حويط

ضرب “يامن” كف على آخر بعدم رضا من قناعات صديقه البالية وهدر بيأس :

= انت غبي أقسم ب الله …..مفيش ست غبية ومش بتحس بخيانة جوزها …انت اللي غبي وفاهم انك حويط هي لو شكها اتملك منها هتحطك في دماغها وساعتها قول على نفسك يا رحمن يا رحيم

قهقه “حسن “وشاكسه :

– اه زيك كده ؟

قذفه “يامن” بالملف الذي أمامه كي يكف عن سخافاته بينما هو تفاداه و انفجر ضاحكًا عندما أمره” يامن” بسأم :

– غور من هنا يلا زهقت منك

لينهض كي ينوي المغادرة وقال بمشاكسة كي يستفز الآخر :

– انا اصلًا ماشي علشان المُزة بتاعتي مستنياني في العربية ومش عايز اتأخر عليها أنا بس جيت أثبت حالة علشان لو “رهف” اتصلت سألتك عني

أمتعض وجه “يامن “بعدم رضا و وبخه بِحدة :
= وكتاب الله انت واطي انا بجد مش مصدقك انت ازاي كده ؟؟

رفع “حسن” منكبيه بلامبالاه وقال وهو يهم بالمغادرة :
– ياعم فكك ويلا سلام …..واه متنساش تسلملي على خالتي والمُزة بتاعتك اللي مطلعة عينك