خطايا برئيه ١

– “حسن” ….سرحت في ايه ؟؟

= هااااا …. لأ ……. ولا حاجة ليتنهد ويقترح كي يكسر ذلك الروتين المميت بالنسبة له :

– ايه رأيك خليكِ بكرة وانا هاجي معاكم بقالنا مدة مخرجناش مع بعض

تهللت أساريرها ونهضت تجلس على ساقيه وقالت وهي تتعلق بِعنقه :

– بجد يا “حسن” ….طب احلف علشان أصدقك

قهقه على طريقتها وسألها بمشاكسة :
-من غير ما احلف انتِ بتصدقيني …..ليمرغ أنفه بوجهها و يهمس :

-مش كده ولا ايه ؟؟

هزت رأسها بقوة تأكد حديثه وأخبرته بمكنون قلبها بكل عفوية وهي تهيم به :
– أيوة بصدقك وعارفة انك عمرك ما تكدب عليا …..علشان انت حبيبي يا “حسن” وكل دنيتي….ربنا يخليك ليا

ابتلع غصة مريرة في حلقه وهو يشعر ان كلماتها تلك رغم صدقها إلا أنها هوت على قلبه كالسياط وجعلت ضميره ينهش به ، ولكن هيء له شيطانه شيء آخر و جعله يهمهم :

– “رهف” ابقي غيري تسريحة شعرك مش عجباني

زاغت نظراتها وأخذت تتحسس شعرها المنسدل بعدم ثقة يحاول زرعها بها وكأنه يتعمد ان يجعل ثقتها بنفسها معدومة ولذلك تبحث دائمًا عن التغير لأرضاءه .ولكن هو ابعد ما يكون عن تفكيرها فهو فقط يتعمد أحباطها كي لا يستشعر كونها أفضل منه وخطائة مثله ،يبحث عن نواقصها بدقة شديدة حتى يقنع ذاته انها تستحق تلك الخطيئة التي يرتكبها بحقها فهي من وجهة نظره خطيئة بريئة مبررة .

ردت هي بطاعة :
-حاضر وهغير لونه كمان

ربت على وجنتها وانهضها عن ساقه ونهض بدوره كي يغادر لعمله لتذكره وهي تضرب مقدمة رأسها بخفة :

-كُنت هنسى أقولك أصل كلموني من مدرسة الولاد بيفكروك ببقية المصاريف

قلب عينه في ملل وأخبرها وهو يرتدي سترته :
-نسيت خالص ……. أنتِ عارفة إنِ مش فاضي الفترة دي ومضغوط جدًا
ليتنهد بيأس ويعاتبها:
-نفسي تتصرفِ لوحدك …..ليه مدفعتهمش انتِ ما كده او كده الحساب مشترك ومفتوح ليكِ في اي وقت كنتِ سحبتي اللي أنتِ عايزاه وشوفي طلباتهم ايه

مطت هي فمها وقالت بقلة حيلة :
-انت عارف الكارت اللي بسحب بيه من Atm الولاد ضيعوه و مش بحب زحمة البنوك ولا كمان بحب أخرج لوحدي، لتتنهد وتستأنف بكل طواعية من اجله :

– بس هعمل كده لو هيريحك بس ياريت تكلم مستر “فهمي”علشان ميعطلنيش كتير

هز رأسه بتفهم وهو يتناول متعلقاته الشخصية وأخبرها وهو يتوجه لباب الشقة :
-هكلمه اول ما اوصل الشركة وهقوله ميرجعش ليا ويعطلك بعد كده