قلب بارد كامل

هزت منة رأسها بقلة حيلة قائلة: مش عارفة ايه اللي خلاني أقول عليها كده، بس جايز كلامهم كلهم أثر فيا، بس هي جابتنا الدنيا علشان نتعذب؟، نفسي أشوف يسر مبسوطة.

ابتسم إليها قائلًا: كل شيء بوجته حلو يا منة، يسر عيجي عليها يوم وعتتبسط، وعتعيش حياتها زينة هي وأولادها، أنا خابر إن خوي عفش، بس هو خوي.

بكت منة بمرارة قائلة: أنا ليه حاسة إنك هترجعهم لبعض؟، طب بلاش علشاني أنا يا شبل، علشان يسر هي مش عايزة ترجعله ومستعدة متتجوزش عمرها.

ابتسم قائلًا: إحساسك غلط يا منة، أنا مش ظالم للدرجة دي، وإن كان على كلامي لأمي، فهو كيف كلامي معاها يوم فرحي واللي نجلته ليكي يسر.

جحظت منة بعينيها قائلة: مش معقول!، أنت عرفت إن يسر نقلت لي الكلام؟، طب ليه حاسبتني على الكلام اللي مقولتوش في حق مامتك؟، وأنت كنت بتهاودها مش أكتر.

أشاح بوجهه للجانب الأخر قائلًا: مع اني مكنتش حابب أتحدتت في الموضوع ده تاني، بس حديت أحمد خلاني أصدج كل حاجة، علشان اكده حابب أخلص أحمد من بوه.

شهقت منة ووضعت يدها على شفتيها بذهول قائلة: لا، مش معقول!، أنت بجد بتفاجئني، يعني أنت بكل اللي حصل ده ناوي تبعد ليث عن يسر والاولاد؟!، ده أنت تبقى عملت فينا معروف كبير.

رفع سبابته قائلًا: اوعاكي يا منة حد يعرف، دي تجربة وععملها معاه وادعي تنجح، أنا خابر هو رايد ايه، رايد يبيع الأرض، وأنا عشتري نصيبه فيها.

نظرت إليه منة باستغراب قائلة: طب افرض الفلوس خلصت؟، ما هو هيفضل عايز ده طماع، وبعدين هتقول ايه لمرات عمي؟، أكيد هترجعه تاني وتفضل المشاكل ما بينكم. يعني كلام هانم النهارده واحنا ماشيين صح، هي ونوارة عملولك توكيل وأنت هتتصرف، وهيمشي فعلًا من البلد، بس أنا خايفة ليرجع تاني.

ابتسم بخبث قائلًا: مش عيرجع تاني، خابرة كيف؟، عقولك جوز صاحبتك الواد الخجول ده، اتصل بيا يشكرني على مجيتي عشيه، أنا وأنتِ طبعًا، طلبت منيه عقد عمل.

قطبت منة جبينها قائلة: عقد عمل!، لمين لا مؤاخذة!، هنهرب؟!، ولا ده ليسر؟، عقد العمل للمدرسين، ايش دخله بيسر ولا حتى بليث، أنا مش فاهمة حاجة!، أنت كلامك ملخبط.

تحدث كفحيح الأفعى قائلًا: جوز صحبتك كفيل، وطول عمر ليث عيحب السواقة، وهناك السواقن بتأكل دهب، فأنا عخليه يروح ويعيش هناك، وعكتب في العقد سبع سنين.