قلب بارد كامل

ثم استطرد بخبث قائلًا: طب ما أتجوزك أني الأول، ولا هو حلال ليه محرم عليا. اااه منك ومن لؤمك يا بت عمي، كل ده يطلع منيكي؟!، وأنا اللي كنت فاكرك جطة مغمضة.

وضعت منة يدها على وجهها مصدومة من اتهاماته، ليستكمل قائلًا: ايه؟!، مالك؟!، كنتي مفكراني عبيط إياك؟، فوقي يا بت عمي ده أنا اللي مربيكي، ولولايا لكنتي شفتي علام ولا مرواح مصر، وده اللي غولطت فيه.

لا تجد رد غير الحزن الذي دخل بقلبها ليستمعا إلى دقات الباب من جديد ليعلن عن قدوم نجية ليزغر ها أن تستقبلها باحترام وتركهم مرة أخرى، لتجلس نجية تنظر إليها باستياء قائلة: اوعي تفكري يا بت البندر إنك اكده كسبتي!، لع، أنا خابرة زين إنك خسرتي. وخسرتي كيف؟، عن طريق حبيب القلب أحمد. شفتي كيف عصينا قلبه عليكي؟

ابتسمت منة بسخريه قائلة: ما أنت مقدرتيش تعملي حاجات عملها عيل صغير؛ علشان خايف من أبوه. بس مسير كل حاجة تنكشف وتبان، وساعتها هيبقا موقفك وحش أوي.

نظرت إليها نجية بتعالي قائلة: وأنتِ بجا هيبقا موقفك ايه لما نبعتوا نجيبوا واد بالفلوس يمثل عليه إنك عشيقته؟، وعتعملي ايه لما يتجوز بت خوي عليكي وتجيب الواد؟

ردت عليها منة بثقة قائلة: ولا تفرق بالنسبة ليا، وأنا عارفة إن اللي فيه شبل ده مجرد غشاوة وهتنزاح، ومش يمكن يا مرات عمي أنتِ اللي تيجي تسترجيني أرجع لشبل؟

ضحكت نجية بسخرية قائلة: كيف؟!، جوليلي كيف؟، لهو أني اتخبلت عاد!، جال أجيلك أترجاكي ترجعيله، ده يوم ما تخرجي من البيت عكون كاسرة وراكي زير.

ابتسمت منة قائلة: الله أعلم ازاي، بس صدقيني يا مرات عمي أنا عندي ثقة بربنا وكبيرة إن شبل هيكون ليا في الأول والأخير. وبكره تقولي منة قالت.

ضحكت نجية باستهزاء قائلة: هنشوف يا بت سلفتي، ده أمك كانت غالية عليا عاد، وكنا كيف الأخوات، اتوحشتني جوي بدي أروح أزورها في قبرها، وأفرق قرص رحمة ونور عليها.

ردت عليها منة بحزن قائلة: ماما الله يرحمها كانت ست ولا كل الستات، استحملت وشافت حاجات لا أنا ولا يسر نقدر نستحملها، بس أنا واثقة إني مش هبقا زي يسر وهتعدي معايا،يا جدة أولادي.

اغتاظت نجية ولوت شفتيها وحركتهما يمينًا ويسارًا وتركتها ورحلت وهي تدعو لها بالخراب.

جاء الليل ليعلن عن ليلة عذاب جديدة بينهما لتسأله وهي تتنازل عن كبريائها قائلة: هو أنت هتبات في الأوضة التانية النهارده برضه؟، دي مفيهاش غير كنبة، مش خايف لضهرك يتكسر لو حابب ادخل الأوضة الكبيرة.