قلب بارد كامل

ابتسمت يسر بمرارة قائلة: مش عارفة أفوق ولا أعيش في الوهم يا منة، أنا عرفت إنه بريء فعلًا، ذنب ناجي الوحيد لإنه سلم نفسه لواحد زي ليث وسمع كلامه.

اختنقت منة قائلة: يسر، بطلي بقا تلتمسي الأعذار لغيرك، أنتِ ايه مش بتزهقي؟، قلتلك ميت مرة اللي عنده عذره يجي ويواجه، مش يداري، وهو غلط.

هزت يسر رأسها بتفهم قائلة: أنا عارفة إنه غلط، بس أنتِ كمان شبل غلط في حقك ومع ذلك سامحتيه، ولا علشان لسه متجوزتيش؟، عمومًا يا منة هو مش واقف على الباب، ولسه مشكلتي متحلتش، ولو اتحلت وفرضًا جه، هنفتح مشاكل جديدة، وهي ازاي أهل الولاد هيقبلوا إن راجل غريب يربي ولادهم.

استشعرت منة أنها ضايقت يسر فربتت على يدها قائلة: أنا عايزاكي متزعليش مني، وكلامك صح وأنا فعلًا سامحت شبل لأنه يستحق، بس أنتِ غيري، لازم المرة دي تحكمي عقلك قبل قبلك.

ابتسمت يسر ابتسامة باهتة وقالت: حاضر يا منة، وأنا عارفة إنك هتكوني معايا أخت كبيرة وعاقلة مش صغيرة، هسمع كلامها وهاخد برأيها، بس اوعي تتخلي عني.

زفرت منة بضيق قائلة: ايه اللي بتقوليه ده يا يسر؟!، أتخلى عنك ليه إن شاء الله؟، أنتِ شاكه إن شبل هيجبرني على كده؟..شبل عمره ما يعملها، ولو شاكة في حماتي متقدرش.

ردت يسر بثقة قائلة: عارفة يا منة، أنتِ قوية وأقوى مني، عملتي لنفسك كرامة وسطهم، مش زيي ضيعت نفسي علشان خايفة من الفضايح، وخايفة على بابا.

ابتسمت منة ونهضت قائلة: مضطرة أسيبك وأروح علشان أحضر العشا لشبل، لأني وعدته إني هرجع، هجيلك بكره، وأول ما يوصلوا لحل هبلغك، تصبحي على خير.

عادت منه إلى منزلها وصعدت سريعًا إلى شقتها ووضعت الطعام وجلست تنتحب مغمضة العينين حتى أنها لم تشعر بقدومه إلا عندما قام بمسح دموعها، لتفتح عينيها المفعمة بالبكاء ليسألها قائلًا: مالك يا منتي؟، لساتك زعلانة على يسر؟، جولتلك عحلها بالطريجة اللي عترضيها، وعرجعلها حقها منيه، ليه البكا عاد؟، عتجطعي قلبي.

ارتمت بأحضانه وبكت قائلة: نار وقايدة في قلبي يا شبل من ساعة ما شفت حالتها، احنا ليه بيحصل فينا كده؟، كل ده علشان أبونا حب المصراوية، طب ما المصراوية كمان حبته.

أخرجها من أحضانه مستغربًا على كلمة المصراوية ليقول: كلام ايه عاد اللي بتجوليه ده؟، المصراوية دي تبجى أمكم، وأحلى مصراوية، ست ولا كل الستات، أنا كنت عحبها كتير، اكفاية أنها جابتك.