قلب بارد كامل
قلب بارد كامل
ابتسم شبل بسخرية قائلًا: ايه عتخافي عليا ولا ايه؟!، لتكوني بتحبيني عاد!،أنا اكده عصدقك. وفي الأخر عطلع عبيط من جديد، بلاش دور المسكنة ده، ودلع الحريم.
رمشت منة بحيرة قائلة: أنا كنت عاوزة راحتك، بس طالما هتأطمني يبقا بالناقص، أنت حر. الجناح بتاعك، نام مطرح ما تحب، أنا أكبر من اني أستخدم أسلوب زي ده معاك.
تضايق شبل من برودها قائلًا: أكبر منيه!، ليييه؟، مشبهش لإياك. لازم أكون متعلم ومتنور وبلبس كيف واد البندر علشان تحبيني وتخافي عليا مش صوح يا منة؟!، يا خسارة حبي ليكي.
تنهدت منه بتعب قائلة: حتة التعليم دي أنت السبب فيها، أنت كان نفسك مراتك تبقا متعلمة علشان تنفع أولادكـ، زي ما أنا نافعة أحمد وأبرار، بس للأسف أنت غلطت فعلًا لأن طلعت مش مهمة.
زفر شبل بحنق قائلًا: يعني المعروف اللي عملته ليكي طلع ملوش قيمة!، اكده عاد!، خيرًا تعمل شرًا تلجى. يا ريتني كنت سمعت كلام بوي وبوك واتجوزتك من بدري.
ثم استطرد بغضب قائلًا: لو كت اتجوزتك بدري، كان زمانك كيف البهيمة في قلب الدار، لكن أعمل ايه في جلبي اللي عشجك وأنتِ كرهتيني فيه وفي نفسي.
غضبت منة وتعالى صوتها قائلة: أنت ايه يا أخي؟، مُصر تبقي المظلوم في اللعبة دي؟، أنت فعلًا مظلوم، عارف ليه لأنك صدقت أمك وعيل صغير. يا شبل صدقني أنا عمري ما أنسى خيرك عليا.
اقترب منها ووضع يده على شفتيها ليخرسها قائلًا: صوتك ميعلاش، أنتِ فاكره نفسك فين؟، فوجي وافهميني صوح. عارفة معنات كلامك ايه؟،إ نك متجوزاني رد جميل، مش اكده معناته؟
أزاحت يده من على فمها قائلة: احسبها زي ما تحسبها، بس احسب برضه الندم اللي هيحصل معاك لما تفوق من كل الظلم اللي عمال تظلمه ليا، بس ياريتك تفوق بدري.
استفزته بجملتها الأخيرة فرد عليها قائلًا: ابقي احسبي وجت الندم لوحديك، ومن عشية امبارح أنتِ غلطتي فيا وفي العيلة كلياتها ولازم تدفعي تمن غلطك ذل وإهانة، يا بت أمك.
أغمضت عينيها عند ذكره والدتها فردت بغضب قائلة: متجيبش سيرة أمي على لسانك، اطلب لها الرحمة. عايزة أقولك على حاجة أنا زميلتي في الكلية هتتجوز الشهر الجاي واحد بيشتغل في الكويت وعرضت عليا عقد عمل كمدرسة هناك وأنا رفضته عارف ليه علشانك، أنا قلت الكلام رغم إني عارفة إنك مش هتصدقه.
سخر منها قائلًا: لع، أنتِ اكده بتكشفي ورجك واحدة واحدة، تكرهيني وتطلجي مني وتتجوزى واحد من زمايلك وتسافري معاه وكده يبقا هجيتي من حياتنا.
