قلب بارد كامل

سرد لها ما سمعه من هانم ونجية وانتفضت لتنهض مسرعة معه ليعودا مسرعين إلى الصعيد وصلا إلى بيتهما ودلفا لتنهض إليه نجية وتحتضنه قائلة: شفت يا ولدي اللي جرالنا..فضيحة..خوك عيجبلي العار..ومرته عتهرب وعتطلق..يا شماته البعدا فيكي يا نجية..أه يا مرك يا نجية.

تضايق شبل قائلًا: حضرتك بتجولي ايه يا أماه؟!، فضايح ايه وجرس ايه؟، محدش عيعملها طول ما أنا عايش، كل حاجة عترجع زى ما كانت، ويسر عرجعها.

نظرت إليه منة بغضب قائلة: ايه اللي بتقوله ده يا شبل؟!، عايز ترجع يسر ليه بعد ما ضر.بها وضر.ب الولاد وراح اتجوز عليها؟، ده كويس إنها مجتش لينا القاهرة.

رد عليها بشبل بغضب قائلًا: أنا جولت عرجعها تبجى ست الدار مش ليه يا منة، وحجها واللي يرضيها عيحصل، أنا مش ظالم للدرجة دي، بس أنتِ شايفة حالة أمي.

نظرت منة إلى نجية بحزن قائلة: طبعًا شايفة، بس معلش في الكلمة مش حضرتك السبب في كل اللي حصل؟، فضلت تعلي فيه عليها، كل ده علشان تحرقي دم واحدة ميتة.

نظرت إليها نجية بغضب قائلة: كأنك شمتانة يا بت البندر، طبعًا، بس عقولك الحالة دي مش عطول واصل، وليث عيرجع لعقله، وعتشوفي يسر عيحصل فيها ايه.

ردت عليها منة باشمئزاز قائلة: بكره اللي قلت ليكي عليه من فترة حصل أهو يا مرات عمي، وحصل بدري كمان، أنا وأختي وأمي معملناش حاجة في حد، ولذلك حقنا بيرجع.

زفر شبل بحنق قائلًا: أنتِ شايفة إن ده وجته يا منة؟، فضينا عاد.

وأنتِ يا أماه اهدي منة معتجصدش، عتفتحي في جروح جديمة عاد ليه؟، خلونا في اللي جاي.

بكت منة وانتحبت قائلة: لا ازاي؟، هي زرعت في قلب ليث القسوة من ناحية يسر، علشان تنتقم من ماما.

ماما اللي كانت دايمًا تقولنا عيب تتكلموا مع مرات عمكم وحش.

تدخلت هانم قائلة: حجك علينا يا منة، أنا ععتذرلك بالنيابة عن أمي، أنتِ خابرة عاد الجرسه اللي احنا فيها، والله العظيم فاتحينها مندبة من عشية، ومش عارفين عنتصرف ازاي؟

تنهد شبل قائلًا: خلاص يا منة، مش وجت بكا عاد، أنتِ خابرة أن دي أم وخايفة علة ولدها عاد، خلونا في المصيبة اللي احنا فيها، عايزين نخلصوه من الغازية.

انفرجت أسارير نجية قائلة: صوح يا شبل؟!، يعني أنت عنديك حل نخلصوا منيها؟، طب كيف؟، ده خوك مبيت عنديها من امبارح، أنا جولت تجيب يسر يمكن يرجع.