فراشه اعلي الفرقاطة ج الاخير

ضيق هو عينيه ، ورمقها بنظرات كادت تخترقها و…
-يزيد متسائلاً بترقب : اومــال هايدي بتقول ان تحاليلها غير كده ، وإنها راحتلها أكتر من مرة عشان تبقى حامل ؟؟!!

صعقت إيلين مما قاله ، وشعرت بالدمـــاء تغلي في عروقها ، وظهر على وجهها بوادر الإنفعـــال و…
-إيلين بنبرة متعصبة : الكلام ده مش حقيقي ، محصلش ابداً ، هي أصلاً مكانتش عاوزة تقولها حاجة شخصية عن نفسها ، وأنا اللي قولتلها دي متجوزة يبقى إزاي كانت عاوزة تبقى حامل وهي أصلاً ماشفيتهاش قبل كده ، ده أنا اللي كنت معاها ، وأنا اللي خدتها بنفسي ..

ثم صمتت لبرهة قبل أن تتابع بـ …
-إيلين بنبرة منفعلة وهي تشير بيدها : وبعدين هي قالت عنها كده ليه إن مكانتش تعرفها أصلا ؟؟ ولا هو أي هبل يتقال نقوم نصدقه وخلاص

حدجها يزيد بنظرات صارمة ، ثم ضغط على أصابع يده في غضب ، وجـــز على أسنانه بشراسة ، ومن ثم أشـــاح بوجهه بعيداً عنها ، و…
-يزيد لنفسه بنبرة متشنجة : أه يا بنت الـ *** ، بقى كنتي بتشتغليني أنا وفرح .. وأنا اللي ظلمتها ، وجيت عليها ، وآآ.. وكنت ناوي .. استغفر الله العظيم .. أنا أزاي مفكرتش انها ممكن تكون بتكدب وبتعمل لعبة قذرة علينا ، كان فين عقلي ساعتها

راقب الجميع يزيد بنظرات حذرة محاولين معرفة ما الذي يفكر فيه حالياً ، فقد كان الأمــــر مفاجأة بالنسبة له ..
قاطع آدم ذلك الصمت الذي ســـاد في المكان بـ …
-آدم بنبرة متريثة : يزيد .. انت معانا ؟

انتبه هو إلى صوته ، ورمقه بنظرات حــادة توحي بالتوعــد و..
-يزيد بنبرة متشنجة : عاوز ايه يا آدم ؟
-آدم بهدوء حذر : أصل انت سكت فجــأة وآآ..
-يزيد مقاطعاً بصرامة : خلاص يا آدم

شعـــرت إيلين باهتزازة في حقيبة يدها ، فوضعت يدها بداخلها ، ثم أخرجت هاتفها المحمول ، ونظرت في شاشته ، فوجدت أن المتصل هو زوجها أمير ، فأدركت أنه ينتظرها بأسفل البناية ..
مـــالت إيلين على شيماء ، واقتربت من أذنها و…
-إيلين بنبرة هامسة : شيماء ، أنا مضطرية أمشي لأحسن أمير جوزي جه تحت ، وأنا اتأخرت

وضعت شيماء يدها على ظهر إيلين ، ثم ربتت عليه بحنو ، و…
-شيماء بخفوت : مافيش مشكلة طبعاً ، ده انتي كتر خيرك على وجودك معانا
-إيلين بجدية ، ونظرات لامعة : دي فرح مش بس صاحبتي ، لأ دي اكتر من اختي ، أنا بجد مقهورة على اللي حصلها ده
-شيماء وهي تزم شفتيها في امتعاض : ده حـــال الدنيا ، بس رغم الظروف دي أن سعيدة إني اتعرفت عليكي
-إيلين مبتسمة بتصنع : شكراً ليكي حبيبتي
-شيماء بخفوت : وما تقلقيش عليها ، أنا موجودة معاها
-إيلين بنبرة متلهفة وهي تمط شفتيها : آووه يا ريت ، لأني بجد هام*وت من القلق عليها