دموع ممنوعه ٤
دموع ممنوعه ٤
كانت نظرته مملوءة بخليط من غضب وأسف واعتزاز عن ما ضاع منهما منذ لحظات ، وقد رأته فى عينيه واضحا تماما .
قال بتردد … جدى عايزنى قبل ما أخرج للحفلة ، انا هغير هدومى وانزله …
اماءت له بالموافقة دون أن تجيب ،
اتجه خزانة ملابسه ، أخذ منه ما سيرتديه داخليا واتجه ناحية الحمام ،
توقف قبل باب الحمام بخطوة عندما سمعها تقول
… ممكن محضرش. ..
تلتفت لها قائلاً. .. متحضريش ايه ؟
… الحفلة دى …
استدار بالكامل لها وهو يقول … مينفعش يافريدة ، انتى رضيتى تكونى جزء من العيلة دى ، يبقى لازم تكونى جزء من كل الأحداث الخاصة بيهم ، أوكى …
قالت بعدم اقتناع … اوكى ..
عاد ادراجه مرة أخرى ، دخل الحمام وأغلق الباب خلفه،
التفتت فريدة للناحية الأخرى وهى تقول بصوت منخفض
… لا ياعادل ، انا لاعمرى كنت من العيلة دى ، ولا هكون …
دموع ممنوعة ،،،،، هناء النمر
الجزء الثانى ،،، الفصل الحادى عشر
…. عادل …
التفت ليرى مناديته التى يحفظ صوتها تقف خلف ستار شباك زجاجى للطرقة المؤدية للمصعد حتى لا يرها أحد ، فهى ليست فى الدور الخاص بغرفتها ، هذا الدور خاص بجناحى عادل وعصام فقط ،
عقد حاجبيه بينما ارتفع أحدهما عن الآخر قائلا … ايه ده ، انتى ايه اللى جابك هنا …
تفاجئ أكثر بل صدم عندما خرجت من خلف الستار ، كانت ترتدى فستان وردى رقيق وقصير ، بدون أكمام وبصدر مكشوف جزئيا ،
لم يجد كلام ، غضبه مما رأى قد لجم لسانه تماما ، ضغط على أسنانه وحاول التحكم فى نفسه حتى لا يفقد أعصابه عليها ،
بدأت تتحرك ناحيته بشكل مغرى ، لا تعلم بأن ما تفعل أصبح يثير اشمئزازه أكثر وأكثر منها ،
رفع يده وبإشارة واحدة توقفت مكانها ،
حرص ان يظل بعيدا عنهاوبصوت منخفض ومتحكم قال
… متدارية كدة ليه ، وايه اللى منزلك هنا اصلا …
.. كنت عايزة اتكلم معاك فى حاجة مهمة …
… حاجة ايه دلوقتى ، وبمنظرك ده …
قالها وهو يشير باصبعه من اعلاها لاسفلها
قالت وهى تحرك كتفيها … مالى ، منا كويسة ، وده لبسى العادى ، ايه المشكلة …
… مفيش مشكلة ياسهام ، بس اتفضلى دلوقتى ، مش وقت كلام ، ومشوفكيش فى الدور ده تانى …
امتعضت سهام وهى تتحرك من أمامه وعينيها عليه وهو يبادلها نظراتها باشمئزاز غريب حتى وصلت لباب المصعد
توقفت حين ناداها , التفتت له وانتظرت ما سيقول
