دموع ممنوعه ٤

…. دقيقة واحدة وهرجعلك حالا ، أوكى …

… اوكى ..

تركها واتجه ناحية مجدى ليقف ليكلمه دقيقة ، ثم توجه الاثنان ناحية باب البيت ، هكذا لن يعود بعد دقيقة كما قال ، يبدوا أنه سيتأخر ،
أرادت الابتعاد عن هذا الجمع ، كل ما احتاجته الآن هو الإنفراد بنفسها ولو لدقائق بعد تصريح عادل ،

تسللت من بين الناس وتوجهت ناحية حوض الزهور التى جلست بجانبه أكثر من مرة ، توقفت أمامه تتأمل وروده وألوانها الرائعة وعقلها ترك روعة الزهور وأعادها رغما عنها لواقعها الذى تعيشه الآن قائلة لنفسها

… ايه ، اتجننتى ، عجبتك كلمتين غزل ، مش ده اللى انت شاكة فيه اصلا وخايفة منه كمان ، مش كدة وبس دا انتى شغلتى واحد من المكتب عليه ، كل معلومة بتوصلك دلوقتى بتأكدلك أن عادل فيه حاجة حاجة غلط انتى مش فاهماها ، وبرده هو نفسه واحد من عيلة المصرى ، العيلة اللى كانت سبب أكبر وجع فى حياتك واللى المفروض انك قررتى تعيدى طريقة انتقامك منهم تانى ،
دلوقتى ريقك جرى اول ما قالك كلمتين ، ايه يافريدة ؟

تنهدت طويلا واغمضت عينيها وأعادت رأسها للخلف ، ثم قالت لنفسها مرة أخرى وكأنها ترد على على ما حدثت نفسها به منذ قليل
… على اى حال ، عشان تقدرى تتصرفى صح ، لازم تعترفى بتأثيره عليكى ، والمفروض أن ده طبيعى لأنه اول راجل فى حياتك ، أول حد يلمسك ، لازم ليه مكان جواكى حتى لو مش بتحبيه …

… ازييك يافريدة …

… محمود ، ازييك …

… الحمد لله ، ازييك انتى مع أنه باين …

… هو ايه اللى باين ؟

… انك كويسة ، كويسة اوى كمان …
قال جملته بطريقة اوحت لها انه يلمح لشئ معين ويبدوا انه عادل ، يريد أن يقول إنها جيدة معه بالرغم مما أخبرها به اليوم صباحا ، وقد فهمت ما يرمى إليه لكنها لم تعلق ، فيكفيها الآن حجر الرحاية الدائر فى عقلها دون توقف ،
… انا فعلا كويسة الحمد لله ، المشكلة بس أن مليش اوى فى الجوده …

… غريبة !

… وغريبة ليه بقى ؟

… أصل اللى باين عليكى غير كدة خالص ، باين انك متكيفة تماما مع الجو ده جدا …

… لو فى حاجة عايز تقولها ، أتكلم على طول …

… محمود ،انا بدور عليك من بدرى … كانت هذه هى جملة سهام التى ظهرت فجأة من العدم .
التفتت لفريدة تحييها بطريقة باردة … أهلا فريدة ..