دموع ممنوعه ٤

الجزء التانى
الفصل العاشر

نظرت لها بامتعاض وكأن ما تقوله لها شيئا غريب لم تذكره من قبل وقالت باستهزاء … ما انتى عارفة أن انا جربت كتير قبل كدة ، وكمان قبل ما يتجوز ، تفتكرى هيستسلم دلوقتى بعد ما اتجوز …

… وليه لأ ، انتى اللى كنتى غبية ، وماشية معاه فى سكة غلط ، انتى عارفاه وعارفة بيحب ايه ، آمال لو مكنتيش مراته سنة كاملة …

… وهو انا كملت سنة ، انتى ناسية ولا ايه ، ده مكانش بيكمل هنا أسبوع ، وبعدها يعمل زعلان ويسيب البيت شهرين …
ثم نفضت يدها بقلة حيلة قائلة .. انا زهقت منه اصلا ومبقتش عايزة أتعامل معاه …

اقتربت منها وجلست على الكرسى المجاور لها قائلة … اسمعى ياسهام ، الموضوع ده مفيهوش هزار ، البت دى لازم أبعد عنا خالص والا هتركب وتدلدل رجليها ، وهنبقى كلنا خدامين عندها ،والحل الوحيد هو عادل ، هنعمل كماشة عليه ،كل واحد من يمة ، وانتى معانا ، حتى لو اللى هتعمليه مش هيجيب نتيجة ، بس على الأقل تشغلى دماغه شوية ، فهمانى ولا دماغك فضى من اللف اللى انتى عمالة تلفيه ..

… هشوف ، بس لو ممالش ، مليش دعوة …

… اشتغلى انتى معاه بزمة بس وسيبى الباقى عليا …

………………………………………………………………..

.لم تعد تفهم مغذى كلامه تحديدا ، فمعظمها ايمائات وايحائات وكأنه يحاول التملص من كلام معين ومباشر يريدها أن تفهمه وحدها دون أن يقوله مباشرة ،
انحنت على المكتب أمامها وشبكت كفيها وقد بانت ملامح الغضب على وجهها قائلة
…. انا مش عارفة انت بتلف وتدور ليه ، شفته فى حفلة ، مازن يعرفه ، علاقة مش واضحة ، كل الكلام ده ليه ، ما توضح كلامك وهات من الاخر …

… انا كلامى واضح يافريدة ، بس انتى إلى مش قادرة تفهمى ، أو بمعنى أصح مش عايزة تفهمى. ..

ضيقت عينيها بحيرة قائلة… عايز تقول يعنى أن ممكن يكون له علاقة بمازن اخوك وشركته ، طب ازاى ….

… معرفش ، ممول أو شريك ، بس كانت علاقتهم واضحة جدا ، بيتكلموا عادى جدا وكأنهم يعرفوا بعض من سنين ….

تنهدت فريدة بنفاذ صبر وقالت … يامحمود ، انت متعرفش عادل ، يمكن انا شاكة فيه فعلا بس مش لدرجة أنه يكون شريك فى شركة رأس مالها ملايين ، عادل مجرد دكتور فى الجامعة مش اكتر …