خطايا برئيه ٧

-ماما “ثريا” وحشتيني اخبارك ايه؟
-وانتِ كمان يا بنتي ربنا يعلم معلش اعذريني

-لأ يا ماما انا عذراكي وعارفة اللي عندك انا كمان مقصرة معاكِ
حقك عليا والله الشغل والولاد مخليني مش مركزة في حاجة…المهم طمنيني عليكِ وعلى صحتك

-ألف حمد وشكر لله يا بنتي أنتِ اخبارك ايه و”شيري” و”شريف” عاملين ايه

-تمام الحمد لله كلنا كويسين…

صمتت”ثريا” بعدها لهنيهة مترددة لتشجعها “رهف”:
-خير يا ماما…سكتي ليه!

تحمحت “ثريا”بحرج ثم قالت:
-“حسن” عايز يشوف ولاده يا “رهف” ولسة عنده أمل انك تسامحيه وترضي ترجعيله

غاب رد “رهف” حتى ظنت “ثريا” انها اغلقت ولكن صوتها المبطن بالحزن وصلها اخيرًا:
– الولاد اصلًا بيسألوا عليه وانا عمالة اقولهم أعذار واتحجج انه مسافر…

تنهدت “ثريا” واستفاضت قائلة:
-هو ملهوش عين يجيلك أو يكلمك ومكسوف من عمايله وبيقول انه ندم ونفسه ترجعيله وتديله فرصة تانية

حانت منها بسمة متألمة وصل أنينها ل”ثريا ” حين عقبت هي:
-فرصة تانية…أزاي يا ماما بس بعد كل اللي حصل

-علشان خاطر ولادك يا بنتي افتكريله حاجة حلوة تخليكِ تبقي عليه

استفاضت “رهف” بإقتناع تام وبقناعات رسخت داخلها بعد نكبتها:
-هو استنفذ كل الفرص وهدم كل اللي ليه جوايا…اللي بتقوليه صعب…وإذا كان على الولاد صدقيني نفسيتهم افضل بكتير …حياتنا بقت هادية من غير خناقات أو زعيق و مفهاش توتر أو اعباء أنا مش أول أم تربي ولادها لوحدها وبعدين ولادي اخدين على غيابه وطول عمري بسد في نواقصه قدامهم ….ورغم ده مش هقولك إني اتعافيت منه بالكامل لأ بس هقولك أنا هعافر لأخر نفس فيا علشان خاطر ولادي وهعمل علشانهم أي حاجة إلا إني ارجع لواحد عمره ما قدرني ولا احترمني… أنا لو فكرت ارجعله يا ماما هكره نفسي ومش هحترمها

-بس هو طبعه مش خاين يا بنتي دي كانت نزوه وهو نفسه اعترف بكده وقال أنه ندم و طلقها

-المبادئ مبتتجزأش يا ماما ومينفعش نبرر الخيانة بمصطلح تاني علشان نجملها…”حسن” عمره ما هيشوف نفسه غلطان هو كسرني و اتهمني بالنقص و برر أن ده حقه وشرع ربنا…واكبر دليل على ده أنه لما طلقها فاكر اني ممكن اسامح وأرجع وكأن جوازه منها الحاجة الوحيدة اللي كسرتني…و اتغاضى عن كونه حد مؤذي، ناقم، وعِشرته مش مريحة…