عن العشق والهوى بقلم نونا المصري 1

فابتسمت الهام واردفت بحماس : مش قلتلك الفرج جيه… دي فرصتنا انا وانتي علشان نشتغل.

فنهظت مريم وقالت : والنبي بلاش احلامك دي…انا متأكدة انهم كتبوا البند دا في الاعلان بس علشان يوهموا الناس …يعني بالعقل كدا مين هيصدق ان شركة عالمية زي دي هتقبل تشغل ناس معندهمش خبرة ؟

الهام : حتى لو كان الكلام دا حقيقي احنا مش هنخسر حاجة لو جربنا.. وبعدين احنا منعرفش ايه مخبيلنا القدر مش كدا ؟

كتفت مريم يديها ونظرت الى الهام قائلة : طيب وانا مطلوب مني ايه ؟

الهام : مطلوب منك انك تجهزي الـ CV بتاعك لما ترجعي البيت علشان تروحي معايا مقابلة الشغل بكرا الصبح… بس وحياتي عندك يا مريم بلاش تفضلي لابسه الاسود دا.

في تلك اللحظة تغيرت ملامح مريم لتصبح حزينة وقالت : ارجوكي يا الهام.. بلاش تضغطي عليا .

فامسكت الهام بيدها وقالت : ما خلاص بقى يا مريم… يعني انتي بقالك 6 شهور وانتي لابسه الاسود ورافضة تكملي حياتك… انتي فكرك ان امك هتتبسط منك وانتي بتعملي كدا ؟

ذرفت مريم الدموع وغمغمت بنبرة مقهورة : لسه مش قادرة اصدق انها ماتت ببساطة كدا يا الهام ، انا بحس ان روحها لسه في البيت معانا.

فعانقتها الهام واردفت : خلاص بقى يا حبيبتي… اللي بتعمليه دا حرام ، يعني الحزن في القلب مش في لون اللبس وكفايه بقى تعذبي نفسك وتعذبيني معاكي..وبعدين الحداد على الميت يبقى تلات ايام مش اكتر وانتي بقالك حاده عليها 6 شهور ودا حرام.

فمسحت مريم دموعها ثم قالت : طيب خلاص.. انا هقلع الاسود من بكرا لان بصراحة ماما جتني في الحلم اكتر من مرة وطلبت مني اقلعه .

الهام : شفتي… حتى هي مش عايزاكي تفضلي زعلانه لان الموت حق علينا كلنا وانتي عارفه دا كويس ومامتك الله يرحمها اخدت حقها لان دا امر ربنا ولا اعتراض على حكم الله.

مريم : ونعم بالله.

فابتسمت الهام واستطردت : ايوا كدا… عايزاكي ترجعي مريم القديمة اللي كانت بتضحك على طول وبلاش العكننه دي ماشي .

فابتسمت مريم بلطف ثم اردفت قائلة : متشكره يا الهام …انا مش هنسى وقفتك معايا ابداً .

الهام : على ايه يا بنتي.. دا اقل واجب وبعدين انتي اختي ومفيش شكر بين الاخوات .

مريم : عندك حق ، قوليلي بقى انتي عرفتي موضوع الاعلان دا ازاي ؟

الهام : كنت بدور على شغل في النت وبالصدفة دخلت الصفحة الرسمية لشركة رويال للتجارة الإلكترونية وشفت الاعلان.