عن العشق والهوى بقلم نونا المصري 1

فابتسم كمال بعد سماع ذلك واردف : عندك ثقة في نفسك ودا كويس…ودلوقتي ممكن تكلميني عن نفسك شوية .

فابتسمت مريم قائلة : اكيد… انا عندي 21 سنه ودرست علوم الحاسوب في معهد التكنولوجيا التطبيقية وتخصصي برمجة التطبيقات والهندسة الألكترونية واشتغلت في Internet cafe لمدة تلات سنين في دوام جزئي وبسبب شغلي انا حبيت عالم البرمجة والانترنت ، وانا مش مرتبطة وعايشه مع اختي الصغيرة لوحدنا في البيت بعد ما اهلي ماتوا يعني انا اللي بصرف عليها.

امسك كمال القلم وكتب شيئاً على الورقة التي امامه وسألها : وبيتكوا بعيد قد ايه عن شركتنا ؟

مريم : مدة نص ساعة في الأوتوبيس .

كمال : طيب معاكي رخصة سواقة ؟

مريم : بصراحة مكنش عندي وقت علشان اتعلم السواقه ودا بسبب المذاكرة والشغل في “الأنترنيت كوفي” بس متقلقش لان الموضوع دا مش هيأثر على شغلي هنا لو قبلتوني يعني..

ابتسم كمال ثم وضع القلم من يده ونظر اليها قائلاً : طيب يا انسه مريم.. السكرتيرة هتتصل عليكي الساعة 18:00 علشان تقولك نتيجة المقابلة…ودلوقتي تقدري تتفضلي واتشرفت بمعرفتك .

قال ذلك ثم نهض ومد يده لكي يصافحها فصافحته قائلة : الشرف ليا انا يا استاذ كمال.. عن اذن حضرتك .

قالت ذلك ثم خرجت من المكتب وهي تشعر بشعور جيد اما كمال فابتسم قائلاً : واثقه في نفسها.. اكيد هتعجب ادهم .

عند مريم….

ذهبت وجلست بجانب صديقتها الهام التي سألتها بسرعة : ها.. طمنيني …عملتي ايه ؟

فابتسمت وقالت : الحمد لله اتصرفت على طبيعتي وكمان الراجل اللي عملي المقابلة حسيت من طريقة كلامه ان في امل علشان يقبلوني.

ابتسمت الهام بدورها وهتفت : بجد يا مريم ، طب الحمد لله.

مريم : الراجل اللي جوا باين عليه محترم اوي وابن حلال يا لولو وان شاء الله كله هيبقي تمام.

الهام : يسمع من بؤك ربنا.

وبعد مرور عشرين دقيقة اتى دور الهام لكي تجري المقابلة ، فاخذت نفساً عميقاً ثم طرقت باب مكتب كمال ودخلت قائلة : صباح الخير يا فاندم.

كمال : صباح النور… اتفضلي.

الهام : متشكرة.

قالت ذلك ثم تقدمت نحوه وانتظرت حتى يأذن لها بالجلوس ، فنظر إليها وقال : استريحي.

الهام : متشكرة يا فندم.

قالت ذلك ثم جلست مقابلاً له فقال : اسمك الهام أمين صح ؟

الهام : ايوا يا استاذ.

كمال : قوليلي بقى يا انسه الهام…انتي ليه عايزه تشتغلي في الشركة بتاعتنا ؟