عن العشق والهوى بقلم نونا المصري 1

فرفع احد الشبان يده وقال : انا يا فندم.

نظر كمال اليه واردف : اتفضل…قول اسمك وعمرك وبعدها اطرح سؤالك.

الشاب : انا محمود ياسين وعندي 25 سنه… وسؤالي ممكن حد يترفد خلال فترة التدريب ؟

كمال : سؤالك جميل …لا اطمنوا احنا مش هنرفد حد خلال فترة التدريب بس لو حد فيكوا عمل اخطاء كبيرة زي تسريب معلومات الشركة لشركة تانيه مثلاً فاكيد هيترفد وهنرفع عليه دعوة كمان… بتمنى ان حاجة زي دي ماتحصلش ابداً .

فقالت الهام : ينفع اسأل حضرتك عن حاجة ؟

كمال : طبعاً ..اتفضلي بس قولي اسمك وعمرك الاول.

قالت : انا الهام أمين وعندي 21 سنه… واللي عايزه اقوله هو احنا نقدر ناخد اجازه في فترة التدريب ؟

كمال : بالنسبة لموضوع الاجازات ف انتوا ماتقدروش تاخدوا اي اجازة في الفترة دي الا اذا كانت اجازه مرضية …حد عنده اي اسئلة تانيه ؟

فلم يتحدث اي شخص دليلاً على لا مما جعل كمال يصفق بيديه قائلاً : ودلوقتي تعالوا ورايا علشان تتعرفوا على اقسام الشركة.

– ثم بدأت جولة التعرف على الشركة وكان كمال يشرح لهم ما هي وظيفة كل قسم ابتداءً من قسم التخطيط الاستراتيجي الى قسم المحاسبة وقسم تطوير التطبيقات وقسم التنسيق الإلكتروني وقسم التسويق الإليكترونى وقسم المعلومات والاتصالات وقسم السكرتارية حتى وصلوا إلى اخر طابق في الشركة فقال بجدية: الطابق دا انتوا مش لازم توصلوله ابداً ..اساساً مالكوش شغل هنا.

فقال احد الشبان واسمه سرحان عبد التواب : وليه بقى يا استاذ كمال ؟

كمال : لان هنا قسم الادارة ومكتب رئيس الشركة ادهم بيه وممنوع حد من الموظفين يجي هنا الا لو ادهم بيه طلب منه انه يّجي .

فقالت مريم : طيب ولو حد فينا كان عايز يطور تطبيق جديد بس محتاج موافقة ادهم بيه يبقى ازي هنوصله ؟

كمال : في الحالة دي تقدروا تطرحوا افكاركوا في اجتماعات الموظفين اللي بتنعمل كل يوم خميس قبل نهاية الأسبوع .

مريم : اوك.

كمال : ودلوقتي وبعد ما اتعرفتوا على الشركة جيه الوقت علشان تتوزعوا في الاقسام…اتفضلوا ورايا من فضلكوا.

قال ذلك ثم سار مغادراً قسم الادارة فلحق به الشباب السبعة الذين تم قبولهم للعمل في الشركة وهم :
1- مريم مراد 21 سنه.
2- الهام أمين 21 سنه.
3- سرحان عبد التواب 22 سنه.
4- ومحمود ياسين 25 سنه.
5- ياسمين عبدالله 23 سنه.
6- اسيل بدر 21 سنه.
7- سليمان شاهين 24 سنه.