سبر أغوار قلبي ٣

أمسك يدها بكلتا يديه ليجعلها تكف عن ضربه و قال بتساؤل : تقدرى تقوليلى لو جبنا ريان و ريانة و سألونى عن جدهم و جدتهم هاقولهم ايه ؟ ترضى لأطفالى أن جدتهم تبقى خاينة ! ماقدرش أكمل حياتى معاكى .. أنا فقت .. هو أه فى وقت متأخر بس فى الأخر فقت ثم ابتعد عنها قائلاً ببرود : أنا هامشى عشان متأخرش على الشغل .. ياريت تلبسى هدومك و تمشى بعد ما أنا أمشى

تالا بانهيار : يتحرق الشغل على اللى عايز يشتغل .. أنا بكلمك .. إزاى تطلقنى قولى إزاى ! و إزاى تقولى كده .. و فرحنا فرحنا اللى بعد أيام

أعطى لها ماجد ظهره و قال بجدية : مفيش فرح أنا خلاص طلقتك .. أنتِ ماتنفعيش زوجة صالحة و أم لعيالى .. صدقينى ماتنفعيش .. أنتِ عمرك ما ركعتيها و لبسك كله زفت و حياتك كلها غلط فى غلط و عيلتك مفيش حد يتشرف بيها

وقفت أمامه و قالت بحدة : يعنى أنت اللى بتركعها ! أنا عمرى ما شوفتك بتصلى ثم أردفت بدموع : أنت لو كنت قولتلى تعالى نصلى .. أنا كنت هاسمع كلامك .. حياتى اللى كلها غلط فى غلط ديه أنا كنت واثقة فيك و مستنياك تصلحها .. حرام عليك ليه تعمل فيا كده .. ليه بتستغل ضعفى و حاجتى ليك .. ليه دة أنا حبيبتك .. أنا توتة ماجد اللى ماجد مايقدرش يعيش من غيرها .. فاكر لما قولتلى ” عاجبنى أوى إحساس إحتياجك ليا و إنك من غيرى مش هاتعرفى تمشى خطوة واحدة ” .. فاكر .. أنا دلوقتى ماليش غيرك .. أمى و أبويا اتخلوا عنى .. ليه أنت كمان عايز تتخلى عنى .. أنت كل حاجة ليا يا ماجد .. أنا بنيت مستقبل و ماضى و حاضر معاك صاحت به قائلة و هى تقول بانهيار : ماجد فوق أنا توتة .. توتة اللى بتحبك و أنت بتحبها .. لم تتحمل أكثر أمسكت رأسها بألم و وقعت مغشياً عليها !
Back
قامت أسيل و جلست على ركبتها و قالت بانفعال ممزوج بالغضب : ايه ماجد ده .. دة ابن

قاطعتها تالا قائلة بجدية : أهدى مايستهلش تخدى ذنوب و تديله حسنات

أسيل بجدية : أصله بارد أوى .. هو مش حبها و هى كده .. هو مش عارف أنها كده .. من أول مرة قابلها و هو عارف إنها كده و عارف إن مامتها بتتخانق مع باباها .. أمال ليه اتحول مرة واحدة كده من ماجد العاشق لماجد الغدار القاسى

نزلت دموع تالا بحرقة و قالت بجدية : غلطة ماجد أنه لما حبها حبها بقلبه بس .. و وقف عقله عن التفكير .. و لما قرر يسيبها وقف قلبه و استخدم عقله بس .. الإنسان السوى الصح اللى حياته بتبقى مظبوتة و ماشية بطريقة سليمة .. هو الإنسان اللى بيوازن بين عقله و قلبه .. بيفكر بالاتنين .. بيشغل عقله و قلبه .. و عمره ما بيلغى واحد فيهم !