دموع ممنوعه ٣

… مادام جدى وافق ، يبقى الكل هينفذ كلامه ، محدش يقدر يعصاله أمر ، غير أن انا معاكى ، وعمى أكرم كمان ، متقلقيش …

… سيبنى أفكر ياعادل ، وهبقى ارد عليكى …

… بجد هتفكرى ..

… وليه لا ، متقلقش ياعادل …

… اوكى يافيري ياقمر ، انا هروح افرح جدى ، خدى بالك من نفسك لحد ما ارجعلك ، أوكى …

… اوكى …

خرج عادل فرحا جدا وقد ظهر عليه من سلامه على ريهام وهو يسرع للخارج ،

دخلت ريهام لفريدة ، وجدتها تجلس شاردة على كرسى مكتبها ، تأرجح به يمينا ويسارا

… ايه ، يافريدة ، ماله بيجرى كدة ليه ؟

.. فرحان انى قلتله هرجع معاه البيت ..

… يانهار اسود ، ترجعى فين ؟

… قال إن جده ندمان وعايز يرجعنى ويعوضنى …

… وانتى مصدقة الكلام ده …

… لا طبعا ، انتى عبيطة …

.. أمال هترجعى ليه …

… وأنا هناك أفضل ، هبقى فى وسطهم ، هوصلهم أفضل ، انا كدة بعيدة اوى …

… انا خايفة عليكى يافريدة …

… أنتى شايفانى رجعت ، ده مجرد كلام ، روحى وابعتيلى سيف وعلى ، مش على جه …

… ايوة ، ماقولتلك الصبح ..

… نسيت ، ابعتيهوملى …

… حاضر ..

فتحت فريدة اللاب توب ، وفتحت ملف فاطيمة الدفراوى ، وبدأت فى قراءة البيانات الخاصة بالفتاة التى يصادقها زوجها ،

تجمدت واتسعت عينيها عندما ظهرت أمامها الصورة ، قرأت البيانات المصاحبة للصورة
كلها بيانات مبهمة ، لا تدل على شخصية صاحبة الصورة ،
فتحت باقى الصور ، لم تصدق ما تراه ، عدد هائل من الصور الخارجة وفى أوضاع مهينة وبعيدة تماما عن مفهوم الحياء ،

لم تكن سعيدة بما شاهدت ، ولا تعلم لماذا ؟ فمن المفترض أن هذا الأمر قد يدعمها أمام عائلة المصرى ،

قالت بصوت منخفض ، أقرب للهمس

… عادل ، ويمكن باعك ومتفرقيش معاه ، إنما أبوكى ، ده ممكن يمو,ت فيها ، ليه كدة ياسهام …

دموع ممنوعة ،،،،،،، هناء النمر

الجزء التانى

الفصل السادس

دخل سيف ومن خلفه على وهما مبتسمان بعد طرق أحدهما الباب ،
كانت شاردة تماما وعينيها على شاشة اللاب وهى تنتقل بين الصور والبيانات المكتوبة تحتها ،

… أستاذة فريدة ، أستاذة ؟ …

ثم ألقى كل من على وسيف نظرة على الآخر تعجبا من شرود فريدة الشديد حتى أنها لا تشعر حتى بوجودهما أمامها ،
أعاد على ندائه بصوت أعلى وفى نفس الوقت يطرق بيده على سطح المكتب ليجعلها تنتبه ….أستاذة فريدة …