دموع ممنوعه ٣
دموع ممنوعه ٣
… ازاى يعنى ؟
…إبراهيم وسميرة عارفين ان شقة فريدة ادام المكتب ، اللى بعت الناس دى ، اكيد ميعرفش. ..
… معتقدش ، مش نقطة نعتمد عليها برده …
… ياجماعة انا قلبت فى كل ملفات السنة اللى فاتت ، مفيش حد معادينا لدرجة أنه ممكن يعمل كدة …
… عموما ، احنا محتاجين وقت ، عايزين ناخد بالنا كويس اوى الفترة اللى جاية ، وكل واحد يحافظ على نفسه وعلى ملفاته كويس لحد ما نشوف ايه اللى هيحصل …
……………………………………………………
…. تمام يافندم ، اكيد طبعا على ميعادنا ، انتى عارفة أن مواعيدى كويسة ، مفيش مشكلة، حضرتك تتفضل تتمم كل شئ وتستلم باقى الداتا اللى طلبتها ونقفل الملف ، مع السلامة …
التفتت فريدة بكرسيها لريهام التى تنتظرها أمام المكتب حتى تنهى مكالمتها مع أحد العملاء
.. جبتى الملف …
… ايوة ، اتفضلى ، ودى فلاشة عليها الداتا اللى فى الملف كلها …
… والنسخة المحصنة فين ؟
… مع راندا نسخة ، وحسن نسخة ، متقلقيش ، مقفلينها كويس …
… تمام … قالت فريدة وهى تضع الفلاشة فى اللاب توب الخاص بها لتسجيل الملف ،
….. فى واحد اسمه ريان النقلى برة ومصمم يقابلك ، بيقول الموضوع مهم …
… مين ريان النقلى ، الاسم ده انا عارفاه …
… انا معرفوش ومشفتوش قبل كدة …
فتحت فريدة خانة البحث على جهازها الالكترونى وكتبت الاسم لتبحث عن هوية صاحبه ،
… مش بقولك الاسم ده عارفاه ، ده جوز فاطيمة الدفراوى ، صاحبة فايل 423 ، مقالش عايز ايه …
… محددش، بيقول حاجة مهمة …
… دقيقتين ودخليه ، أكون خلصت تسييف الفايل ، ومتديلوش معايا اكتر من 5 دقايق عشان الحق اراجع بياناته عشان فاطمة الدفراوى نفسها ميعادها الساعة 4 ، هى اللى كانت بتكلمنى من شوية ، عايزة أخلص الموضوع ده ، اخد وقت أطول من اللازم …
… تمام ياأستاذة …
وبالفعل خرجت ريهام وبعدها بثلاث دقائق تقريبا سمحت للرجل بالدخول ،
بمجرد دخوله ظهر عادل وهو يهرول ناحية مكتب ريهام والقلق واضح عليه من بعيد ،
… فى ايه ، ايه اللى بيقوله البواب ده ؟
… برده البواب ، هو عامل نفسه نشرة الأخبار ولا ايه …
.. يعنى فعلا حصل ، وفريدة فين ، هى كويسة ؟
… كويسة جدا الحمد لله ، محصلش حاجة خالص ، فى عميل معاها دلوقتى ، خمس دقايق وتدخلها تطمن عليها بنفسك ، اتفضل حضرتك ،
ثانية واكلمهم يحضرولك قهوة …
