الروايه ٢

اللهم يارب كل شئ اغفر لنا كل شئ و لا تسألنا عن شئ

5

قبل ما نبتدى البارت عاوزة اقول كلمتين عشان نحاول نهدى اعصابنا شوية

لازم نبقى متفقين ان ماحدش بيعترف انه غلطان و من ضمنهم كل ابطال الرواية اللى ظهروا و اللى لسه ماظهروش كل واحد بيبقى شايف ان له مطلق الحرية انه يعمل اللى هو عاوزه و ماحدش شريكه

الانسان بطبعه كده و عشان كده بس حبيت اقوللكم انى مش مع سالم بس برضة مش ضده و لا مع نهى و لا ضدها حتى شمس لا انا مأيداها فى المطلق و لا برضة مغلطاها

كل الحكاية .. ان دى اول رواية اكتبها مقتبسة من قصة حقيقية .. فكرة الراجل اللى وقع فى حب اتنين و هو مصدق ده .. مصدق انه فعلا بيحبهم هم الاتنين زى بعض فدى الفكرة الاساسية اللى بنيت عليها روايتى و اللى اتمنى انها تفضل شداكم و عجباكم للنهاية اللى لسه بدرى عليها لان لسه فى شخصيات و احداث كتيرة ماظهرتش

البارت الخامس

سالم و هو بيكلم شيراز على التليفون قوليلها يا شيراز انى عمرى ما طمعت فيها قوليلها ان الدنيا و الشغل خدونى لدرجة انى نسيت انى مديون لها بتمن اللى كتبته باسمى رغم ان الفلوس اصلا كلها تحت ايدها فى الحساب المشترك صحيح نسيت احوله على حسابها الشخصى بس لان الفلوس من البداية كانت تحت ايديها ماركزتش

قوليلها ان سالم مايطمعش فى اللى مش ليه يا شيراز

قوليلها تفكر على مهلها و قوليلها ان عمرى ما اقدر اعيش من غيرها هى و ولادى

و قوليلها كمان انى بعتذر عن كل لحظة اتصرفت فيها على انى شريكها بجد و لو ماكانتش استردت كل حاجة كنت انا بنفسى دلوقتى هردلها كل مليم صرفته من فلوسها فى حاجة تخصنى و على العموم انا لسه مديونلها بتمن الشقة اللى اتجوزت فيها انا و نهى و اللى يمكن تكون نسيت تستردها هى كمان عشان اردهالها انا بنفسى و من الصبح هعمللها تحويل بتمنها و متهيالى كده نبقى خالصين لكن لاأ .. لسه مش خالصين انا كده ابقى لسه مديونلها بتمن اكلى وشربى و لبسى

هبقى مديونلها بمصاريف اكل و شرب و لبس ولادى و اكلها و شربها و لبسها هى كمان طول السنين دى .. خليها تحسب حسبتها و تشوف انا مديون لها بكام يا شيراز .. و انا ملزم انى ارد لها كل مليم اتصرف

بس كمان اللى بعت الفيديو ده يقصد حاجة كبيرة من وراه يقصد يزود المشكلة بيننا و يوسع الفجوة انا طبعا ما اعرفش مين اللى بعتلها الحاجات دى بس فهميها تاخد بالها من اللى حواليها