خارج اسوار القلب 2

ظلت الأم تربت على كتفها وقالت محاولة تهدئتها :
– ياجمانة مايقدروش يعملوا حاجة, لو اتنازلتي عن حقك انت حرة لكن كمان ده حق بنتك اللي انت مسئولة عنه قدام ربنا, ماتخليهوش يضيع منك وحافظي لها عليه.

بكت أكثر وهي تقول :
– حق ايه يا ماما ؟ دول عاوزين ياخدوها نفسها, ربنا عالم بحالي وعارف اني هاعمل كده غصب عني, المهم بنتي تفضل معايا.

أخذت والدتها نفسا عميقا تطفئ به النا,ر المستعرة في جوفها ثم قالت مرة أخرى :
– جمانة ماتتسرعيش, مش من حقهم ياخدوها وأعلى مافي خيلهم يركبوه, أنا هاكلم لميا وأخليها تيجي ونشوف القانون في صف مين, صدقيني ما يقدروش, اوعي تضعفي وتتنازلي عن حقك وحق بنتك أبدا وكلنا معاكي ماتخافيش.

استكانت بين ذراعي والدتها وإن لم تكف دموعها عن الانهمار أويسكن قلبها عن الوجع

الفصل الثاني عشر
______________

جلست تتأمل زوجها النائم في حزن, لكم ودت أن يشعر بها أو يفكر في قلبها المنهك والمحمل بالأثقال كما يفكر في نفسه وفي أبوته المكتسبة الضائعة, لم تدر ما تفعل لكنها أرادت أن ينتهي الأمر وتوشم الحروف بنقاطها ويسيل دم قلبها الذبيح في صدرها حتى تنهض من رماد نفسها المحترقة مرة أخرى بعيدا عنه, قررت أن تفاتحه في الأمر لكنها مشتتة بين اليوم وغد وبعد غد ومستقبل بعيد, مشتتة بين تناسي الأمر وتجاهله وبين إيقافه عند حده وإنهائه, رن هاتفها فجأة مقاطعا نهنهات محبوسة بين ضلوعها فالتقطته سريعا لتكتم أنفاسه كما هي مكتومة في صدرها وتطلعت لاسم المتصل لتجد (جمانة), عقدت حاجبيها في قلق فقد تأخر الوقت, خرجت من الغرفة متجهة لمكتبها وهي تفتح الخط لتجيب شقيقتها :
– السلام عليكم, خير ياجمانة في حاجة ؟

أتاها صوت شقيقتها الباكي ترد :
– الحقيني يا لميا هياخدوا مني ملك.

ردت بسرعة شاعرة بالصدمة :
– اهدي بس وفهميني مين دول اللي هياخدوها ؟ ماتخافيش ياحبيبتي.

أتاها الصوت الدامع يمزق نياط قلبها :

– أهل حسام, عاوزين ياخدوها عشان ميراثها من أرض باباها, الحقيني يا لميا.

تطلعت للساعة أمامها لتجدها تخطت منتصف الليل بدقائق فقالت بحنان :
– خلاص خلاص اهدي ياجمانة انا جايالك حالا, ماتخافيش ياحبيبتي ماحدش هيقدر ياخدها منك طول ما أنا موجودة, اهدي بقى وماتوجعيش قلبي عليكي.

سمعت صوت شقيقتها تهدأ قليلا وبدا وكأنها تمسح دموعها بكفيها شعرت بالحنان يغزو قلبها فقالت :
– معلش ياحبيبتي أنا مسافة السكة وأكون عندك إن شاء الله.