حكايه ابن 1

يحيى : يا مونى ما انتي عارفه رأي ماما في الموضوع ده .

منار : عارفه يا يحيى بس انا لغاية امتا هفضل كدا . انا نفسي اشوف العالم وادرس واتعلم وأحقق ذاتي وأبنى مستقبلي بإيدي ..

يحيى : بس ماما وجهة نظرها ان البنت مينفعش تسافر لوحدها ..

منار : بس متقولش بنت ..

يحيى : هوا عشان قصيتي شعرك وبتلبسي لبس رجالي يبقا معنى كدا انك مش بنت يعنى ..

منار (بغيظ) : شعر إيه بأه اللي قصيته ده ما ماما لبستنى الحجاب غصب عنى .

يحيى (بغضب) : لا هوا انتي كمان مكنتيش عاوزه تلبسيه ولا إيه .

منار (بحنق) : يا سيدي هوا انا قولت حاجة .

يحيى : انك بنت و بنت حلوة كمان دي حقيقه انتي عمرك ما هتقدري تغيريها .

منار : طب عشان خاطر حاول تقنع ماما هيا بتسمع كلامك عشان خاطري عشان خاطري

يحيى : حاضر يا ستي هحاول .

احتضنته منار بسعادة وقبلته من جبينه وذهبت مسرعة .

_ _ _ _ _

بعد قليل في غرفة منار ..

سناء : يلا يا منار عشان توصلي اخواتك يارا و مليكة للمدرسة بعربيتك .

منار : ماما انا لسا مخلصتش لبس ولسا قدامي الطرحه اللي مبعرفش اظبطها دي خلي يحيى يوصلهم .

سناء : يحيى مش نازل النهارده .

منار : خلاص يا ماما ياخدوا تاكسي انا هاخد المو…توسيكل اصلا مش طالعة بالعربية .

سناء : مفيش موتوسيكلات و هتوصلي اخواتك و كلمة تانية مش عاوزه

منار ( بتأفف) : حاضر يا ماما .

سناء : طب يلا عشان اخواتك جهزوا متأخريهومش .

وبعد قليل تنزل منار ..

سناء (بغضب) : انتي هتخرجي كدا ؟

منار : وماله كدا بس يا ماما .

سناء : امشي انجري البسي حاجة طويله ع البنطلون ده لبس الرجالة ده مش عاجبنى .

منار (بتأفف) : ماما انا معنديش وقت انا هوصل اخواتي ورايحة التدريب ..

سناء : انا مش قولت مفيش تمرين كونغ فو دا تانى ..

منار : ليه بس يا ماما ..

سناء : انتي مش شايفه شكلك بأه عامل ازاي .. دا شكل بنت ده .. ولا ده لبس بنت ده .. انا حاسة انى مخلفة راجل ..

منار (بغضب) : أيوة راجل و هفضل راجل غصب عن الناس كلها ..

وخرجت بغضب مسرعة ..

سناء : انتي يا بنت ..

يحيى : سيبيها يا ماما ..

سناء : اسيبها ازاي بس اختك دي هتجنني .. شوف لبسها عامل ازاي ولا مشيتها ..

يحيى : سيبيها بس يا ماما ما انتي عارفه العقده اللي عندها ..

سناء : و هتفضل لإمتا كدا يا يحي انا نفسي افرح بيها وأشوف ولادها ..