خطايا برئيه ج الاخير

تشبثوا الصغار بساق “رهف” بخوف لتقول هي بشراسة وهي ترمقها شذرًا من اخمص قدمها لاعلى رأسها:
-اه بيت ابوهم واتكلمي عدل أنتِ مين وبتعملي ايه هنا؟

اجابتها وهي تلوك علكتها بطريقة فظة وتتخصر أمامها:
-آآآه افتكرتك انت طليقته اظن فاكراني انا اللي جيت سألت عليه في المستشفى

ابتلعت “رهف” غصة بحلقها واعادة صياغة سؤالها:
-ايوة عرفت بس بتعملي ايه هنا بالمنظر ده مش فاهمة!

طالعت “سميرة” قميص نومها الصارخ الذي يظهر من أسفل مأذرها الشيفون ثم أجابتها ببسمة منتصرة وكأنها فازت بجائزة:
-هو انا مقولتلكيش أصل مستر “حسن” كتب عليا ليلة امبارح
أصله ياعيني وحداني وعايز حد يونسه وملقاش احسن مني

شهقوا الصغار بينما هي ظلت لثوانِ متجمدة بأرضها لا تستوعب ما نطقت به وحين فعلت نمت بسمة على ثغرها وظلت تتسع إلى أن تحولت إلى ضحكات هستيرية متلاحقة

-بتضحكي على ايه عايزة افهم؟
قالتها هي بصوت جهوري وهي تضع يدها بخصرها وتنظر لهم بنظرات جعلت الصغار يرتعبون منها تزامنًا مع خروجه يرتدي روب الاستحمام ويجفف شعره بمنشفة صغيرة وماإن رآهم شحب وجهه وسقطت المنشفة من يده وهمس بأسمها:
-“رهف”

هزت رأسها وتزايدت ضحكاتها ثم تخطتها وتقدمت منه تضع بحضنه قالب الكيك وتلك الاشياء التي كانت يساعدوها ابنائها في حملها ثم قالت متهكمة بسخرية مريرة:
-اه “رهف”…مبروك يا عريس فرحتلك…أنا وولادك كنا جاين نحتفل بعيد ميلادك بس يظهر أنك احتفلت بطريقتك…مبروك

زاغت نظراته وحاول التبرير وتقمص دور الضحية كعادته:
-“رهف” انتِ فاهمة غلط خليني افهمك…انا اتجوزتها علشان
تشوف طلباتي…

صدر صوت ساخر من فم “سميرة” ولوت فمها على خنوعه وتبريره لها التي عقبت عليه مستنكرة:
-طلباتك ده ايه؟ شايفني الفلبينية اللي بتدفعلها بالدولار وبعدين انت خايف منها ليه قولها أنك كنت هتموت عليا واتجوزتنى علشان أدلعك بعد النكد اللي عيشتك فيه

زعق بها بعصبية كي يخرسها:
-اسكتِ الله يخربيتك

ابتسمت “رهف” بسخرية ونفت برأسها بلافائدة وعقبت على حديثها وكأن الأمر لم يعد يعنيها:
-متتعصبش يا “حسن” هي من غير ما تقولي أنا عارفة كويس اسبابك واظن شرحتها ليا باستفاضة في مرة قبل كده …
لتهزأ من ذاتها ومن ذلك القرار الغبي التي كادت أن تقدم عليه لولا رأفة ربها:
-عارف أنا كنت فاكرة اللي فات غيرك وكنت بحاول اقنع نفسي اعيش معاك علشان خاطر الولاد بس انت رغم ندمك قبل كده إلا أنك اثبت بكل براعة أن اللي فيه طبع عمره ما يقدر يغيره