قبل فوات الاوان ٣

————————————————–

الحادية عشر الا الربع صباحا
رتب حقبته الصغيرة ثم كل شيئا قام بتحضيره ،اتصل بمعتز اتصاله الاخير قبل سفره
هشام : ايه يا ابني كلمت حازم ولا لسه
معتز : مش انت قولت استنا اول ما توصل
هشام : طب كويس
معتز : حتوصل امتي
هشام : انا نازل دلوقتي اهو يعني قدامي ممكن كمان 3 ساعات واكون عندك
معتز : طب اول ما توصل كلمني و عموما كله تمام
الي سيارته فتح بابها وركب فيها و بعين مملوءة بالغل انطلق بها ، يدا تتولي القيادة بينما اليد الاخري تزفر الدخان
ليس في عقله سوي صورة ندي يشعر بالضيق انها في النهاية فضلت حازم عليه ، مني نفسه اليوم ان يتشفي
و في نفسه قال : ماهو يا روحي يا روحك يا حازم يا صاوي وانت اللي اخترت ، انهارده حتشوف مين فينا اللي حيكسب ده اذا لحقت تشوف استعد يا صاوي و——————— يا سلام عليكي يا ندي في الاسود حتبقي تجنني

———————————————————-
الثانية عشر و النصف ظهرا
انهت صلاة الظهر وانطلقت الي الشرفة لتري البحر فكرت حينها الاتصال بنفيين لتري ما هي اخبار العروسة
حملت هاتفها واتجهت الي الشرفة
ندي : سلام عليكم ، ازيك يا عروسة
نفيين : ازيك انتي وبعدين انتي اللي عروسة مش انا ، انا لسه باعتبار ما سيكون
ندي : يا ستي ان شاء الله يكون ويكون كمان وربنا يتمملك بخير يا قمر ، عمو نبيل حيكون موجود
نفيين : ايوة ، بس المرة دي قال لماما انه مش ناوي يستعجل في الموضوع
ندي : ازاي يعني مش فاهمة
نفيين : مش عارفة يا اختي اظاهر جاية علي حظي واتقفلت
ندي : يا ستي اكيد عايز يسأل عليه مش اكتر ، انتي عارفة عمو نبيل خايف علينا
نفيين : بس ماما بعد المكالمة بتاعته قلقت وقلقتني
ندي : ليه بس
نفيين : بتقولي عمك المرة دي قال لازم خطوبة مش اقل من سنة و كمان نسأل عليه كويس وقالها لو قالي مستعجل زي حازم كده حاقوله معنديش بنات للجواز
ندي : طب معلش بس هو ممكن يكون بيقول كده قدام العريس ، عموما انا متأكدة ان عمو حيتصرف صح المهم انتي متقلقيش وعايزكي قمر كده زي ما انتي واوعي توقعي حاجة علي عصام تحطي الصنية بالراحة كده و تهدي شوية بلاش الشعننة بتاعتك دي
نفيين : يا بنتي انا حاسة ان انا مش حاقدر اطلع المقابلة دي اصلا ده انا ايدي متلجة من دلوقتي ربنا يستر
ندي مبتسمة : ياه اخيرا جه اليوم اللي نفيين ام لسان طويل تتلم فيه ، ده انا حاموت واشوفك مكسوفة
نفيين : اديكي حتشوفني يا ستي
ندي : يلا ربنا يتمم لك بخير
قاطعها حازم من وراءها وهو يقول
حازم : سلميلي عليها
ندي : حازم بيسلم عليكي
حازم : وقوليلها عصام بيرفص وهو نايم
ندي بضحك : هووووش بس
ندي : يلا سلام بقي
————————————————
الواحدة ظهرا
بعد ساعات من البحث اخيرا وقف مدحت امام مكتب المحامي نشأت نجيب زفر بقوة وهو يقول : اخيرا
ثم ترجل باتجاه المكتب
مدحت لسكرتيرة المكتب : سلام عليكم ده مكتب الاستاذ نشأت نجيب المحامي
السكرتيرة : ايوة يا فندم اقوله مين حضرتك
مدحت : قوليله مدحت نبيل عبد الدايم السنهوري
دقائق من اجل اعلام المحامي ثم عادت الي مدحت : اتفضل يا فندم
تنهد مدحت وهو يتقدم خطوات من اجل الدخول كل ما كان يمني نفسه به هو ان ما يسمعه لا يزيد من شعوره بالقلق اتجاه ابنة عمه
نشأت : استاذ مدحت نبيل عبد الدايم السنهوري
مدحت : ايوة
نشأت : اتفضل
مدحت : خير انا عرفت من الراجل اللي حضرتك بعتوه انك كنت محامي عمتي
نشأت : الحقيقة لا انا مكنتش محامي عمتك
مدحت : حضرتك كنت محامي رفعت
نشأت : لا بردوا انا لا كنت محامي عمتك ولا محامي رفعت لكن اعرف محامي رفعت الله يرحمه او تقدر تقول ان محامي رفعت هو اللي عرفني علي تفاصيل القضية اللي تخص عمتك
مدحت : طب انا كده محتاج حضرتك تدخل في الموضوع وتوضحلي بالظبط في ايه
نشأت : بص يا استاذ مدحت الموضوع وما فيه باختصار شديد إن انا كنت باشتغل عند الاستاذ شوقي حسين وده هو محامي رفعت وبعدين سيبت الشغل في مكتبه بسبب سمعة شوقي وشغله اللي كان مش مظبوط شوقي اتوفي الله يرحمه من حوالي اسبوع وقبل ما يموت بفترة تعب و قرر تكفيرا عن اللي عمله انه يجبيلي القضايا اللي كان سبب في ضياع حقوق اصحابها بسبب التلاعب بثغرات القانون عشان اشتغل فيها واحاول اصلح اللي عمله ، نجي لموضوع عمتك يا استاذ مدحت
مدحت : اتفضل
نشأت : رفعت الله يرحمه قبل ما يموت كتب وصية اعترف فيها انه اجبر السيدة احلام عبد الدايم بالتنازل عن ورثها لصالحه وقرر رد الفلوس كلها وساب الوصية مع المحامي بتاعه الاستاذ شوقي حسين بس بعد وفاة رفعت اسرة رفعت قررت ان الوصية دي محدش يعرف عنها حاجة واخد شوقي منهم رشوة مقابل سكوته بس وفضلت الوصية في مكتبه لحد ما جابلي كل اوراق القضية وطلب مني ان اكلم اهل احلام او احلام نفسها واعرفكم بموضوع الوصية وان حقكم مثبوت بموجب الاعتراف ده
مدحت : يعني اسرة رفعت تعرف بموضوع الوصية
نشأت : اللي عرفته من الاستاذ شوقي انهم يعرفوا
مدحت : طب حضرتك دلوقتي احنا المفروض نعمل ايه
نشأت : ممكن ترجعوا ترفعوا القضية تاني وانا عن نفسي حاقدم الاوراق اللي عندي معاكم بس ممكن في الاول تعرفوا اسرة رفعت انكم دلوقتي عرفتوا وان حقكم مثبوت ونشوف ردهم وده انا كنت ناوي اعمله ان ابلغهم باللي عندي
مدحت : طب ممكن قبل ما تبلغهم تديني فرصة اعرف عمتي ووالدي بالموضوع واشوف هما ناويين يعملوا ايه
نشأت : تحت امرك