قبل فوات الاوان ٣

———————————————————–

مر اسبوع علي زيارة حازم كل يوم يفكر حازم ان يتصل ولكنه يتراجع عند اخر لحظة ويقول في نفسه اديها فرصة انهاردة كمان
بينما ندي تقريبا طيلة هذا الاسبوع لم تستطيع التوقف عن التفكير والاستخارة كل يوم بل كل ساعة ، علا صوت نفيين لقطعها من شرودها
نفيين : مش حتيجي تشوفي الرؤية بتاعة رمضان
ندي : ماهم قالوا بعد بكرة
نفيين : ايوة ما انا بحب اسمع الراجل اللي بيطلع يقول غدا المتمم لشعبان وبعد غدا هو اول ايام رمضان اعاده الله علي الامة الاسلامية بالخير واليمن والبركات
ندي بضحك : طب يا ستي كل عام وانتي الي الله اقرب
نفيين : مفيش كمان كده والسنه الجاية اكون في بيت العيدل
ندي : بيت العيدل يا رب بس ساعتها يطلع عيدل

قاطعها صوت الهاتف فنادت شريفة علي ندي
شريفة : ندي تليفون
ندي و شعرت بالتوتر : مين يا ماما
شريفة : الحاجة اماني
اتجهت ندي ببعض الهدوء واستلمت الهاتف ودخلت به الي غرفتها بينما اتجهت نفيين للتليفزيون وشريفة للمطبخ
ندي : سلام عليكم ، كل سنة وانتي طيبة يا حاجة
اماني : وانتي طيبة يا ندي ازيك وازاي ماما ونفيين
ندي : الحمد لله كلنا بخير وبنسمع الرؤية اهو
اماني : انا متصلة اسألك علي الاعتكاف السنة دي مردتيش عليا
ندي : والله ماما مش راضية كل العشرة الاواخر بتقولي ممكن يوم او يومين في الاخر كده وخلاص فمعلش بقي
اماني : خلاص يا ندي مفيش مشاكل بردوا انا كمان يمكن مقدرش علي الدائم رغم ان الحاج حامد طبعا بيعتكفهم كلهم بس بردوا البيت والولاد مش بيخلوني اعرف اروح الا يوم او يومين ، خلاص بس ابقي قوليلي ساعتها حتروحي امتي علشان نبقي ساعتها نفطر مع بعض في المسجد
ندي : ده حيبقي يوم ، خلاص ان شاء الله اكلمك قبلها يا حاجة
اماني : انتي معندكيش اخوات غير نفيين مش كده
ندي : ايوة يا حاجة ليه
اماني : ابدا قلت لو عندك اخوات ولاد يعني تقوليله علي الاعتكاف بردوا
طرقت الفكرة علي عقل ندي : اخوات ولاد ، طب هو اعتكاف الرجالة حيكون في نفس المسجد
اماني : ايوة يا ندي هما عند الرجالة واحنا عند الستات
ندي : طب هو ممكن اي حد يجي من بره يعتكف ولا لازم الاخوة اللي يعرفهم بس الحاج حامد
اماني : لا طبعا ممكن اي حد يعتكف بس الحاج حامد هو المسئول عن تنظيم الموضوع مش اكتر