قبل فوات الاوان ٣

——————————————————-

السابعة مساءا
وصل امام منزل عمته ركن سيارته واتجه ليطرق الباب ، دقائق وكانت احلام امام الباب لتفتحه
احلام : مدحت
مدحت : مساء الخير يا عمتو
احلام : مساء النور يا ابني عاش من شافك
مدحت : معلش يا عمتو انتي عارفة من يوم موضوع ندي وانا مش عايز اجي
احلام : خير يا ابني اتفضل
بينما دخل مدحت الي منزل عمته
كان عصام يتجهز مع والدته ليتجه الي منزل نفيين وبالتأكيد دقائق وسيصل نبيل الذي لم يكن يعلم ان مدحت عند اخته
عندها كان حازم بطريقه الي مطعم كريستالة ليقابل معتز متوقعا ان الامر مجرد خروجة مع اصدقائه

الحلقه 27

احلام : انت بتقول ايه يا مدحت
مدحت : اللي سمعته يا عمتي وصية رفعت دي هي اللي حتثبت حقك ها يا عمتي ناوية علي ايه
احلام بتلعثم : انا مش عارفة انا مش عايزة مشاكل يا مدحت يا ابني
مدحت : انتي خايفة من ايه يا عمتي بس
احلام : احنا كده حنعمل مشاكل لندي و انا مش عايزة مشاكل يا ابني
مدحت : بصي يا عمتي انا عايزك متخافيش من حاجة ولو في حاجة قلقاكي يا ريت تقوليلي عليها وانا اوعدك ان حاقف جانبك واحليلك الموضوع
احلام وقد فكرت ان تسرد لمدحت الحقيقة : طب توعدني انك تتصرف من غير مشاكل لحد
مدحت : اوعدك يا عمتي
احلام : طب انا حاقولك كل حاجة من اول يوم عرفت في رفعت

————————————————————–
الثامنة والنصف مساءا
امام المرآة وقد شعرت ببروده ايديها تلمست وجهها الاحمر من كثرة التوهج لحظة ودق جرس الباب معلنا قدوم عصام ووالدته شعرت بدقات قلبها تتعالي وهي تحاول ان تزفر حتي تستريح مما تشعر توجهت الي المطبخ لتري والدتها دقائق وخرجت هي الاخري في استقبالهم
شريفة : يا اهلا وسهلا يا جماعة نورتونا
مدت يدها لتصافح عصام ووالدته
شريفة : اهلا يا عصام ، اهلا يامدام مني
مني : يا اهلا بحضرتك والله انا حبتكم من قبل ما اشوفكم من الكلام الكويس اللي قالوا عصام عنكم وفرحت اوي لما عرفت ان اخت الانسة نفيين تبقي مرات حازم
نبيل بضيق : يا اهلا يا ابني
عصام : اهلا يا عمي
مني : امال فين الانسة نفيين
شريفة : دقيقة واحدة
اتجهت شريفة لنفيين
شريفة : ايه يا بنتي انتي حتباتي في المطبخ خدي الصنية واطلعي
نفيين : لازم يعني موضوع الصنية ده ، انا مش عارفة مفيش اي احساس بالعروسة ابدا
شريفة بهمس : يلا يا اختي حتعملي عليا انا مكسوفة
نفيين : طب اديني وضعي شوية ده العريس بره
تقدمت خطوات لتنظر بفرحة علي الورد الموضوع علي المنضدة والشيكولاتة ثم تقدمت باتجاه حماة المستقبل
مني : يا اهلا وسهلا بسم الله ما شاء الله ، بس عصام مش بيعرف يوصف
نظرت لعصام : دي اجمل بكتير من اللي حكتهولي
نفيين وهي تضع الصنية وتمد يدها لتصافح مني : اهلا وسهلا يا طنط
نظرت لعصام بسرعة : اهلا يا مستر عصام
عصام بابتسامة متسعة : اهلا وسهلا يا انسة نفيين
عصام لنبيل : طبعا حضرتك عارف اني جاي اطلب ايد الانسة نفيين واتمني ان حضرتك توافق ولو امكن اننا نقري الفاتحة انهارده و————————–
قاطعه نبيل : انت مستعجل زي صاحبك بس يا ابني انا المرة دي ليا شروط
عصام : اتفضل انا تحت امرك
نبيل : معلش يا ابني بس انا عايزة فترة خطوبة مش اقل من سنه
عصام : ليه بس يا عمي انا ممكن اظبط شقتي ومش عايز حاجة غير بس الانسة نفيين
نبيل : معلش يا ابني ده شرطي ومفيش حاجة دلوقتي قبل ما نسأل عليك ، متزعلش مني
مني : لا ان شاء الله مفيش زعل وطبعا انتم معاكم حق ، بس انتم شوفتوا حازم واهو اتجوز ندي وعصام وحازم واحد يعني اخلاقهم واحدة وصدقوني انا عارفة عصام ومش علشان ابني انا متأكدة انه حيشيل الانسة نفيين في عينه
نبيل : معلش الاصول اصول يا ابني قلت ايه
عصام بامتعاض : اللي تشوفه يا عمي