قبل فوات الاوان ٣

—————————————————

فلاش باك ——————— الاثنين مساءا

خطوات مترقبة باتجه احدي المحال التجارية من ان الي اخر يسأل ذات السؤال
: لو سمحت محلات الحاج نبيل عبد الدايم السنهوري
: ايوة شايف المحل اللي في اخر الصف ده ، المحل اللي هناك
: شكرا
توجه خطوات باتجه المحل الي ان دخله
: السلام عليكم
تقدم مدحت خطوة ورد : وعليكم السلام ورحمة الله وبركاته
: الحاج نبيل موجود لو سمحت
مدحت : لا والله هو في البيت لو في حاجة انا ابنه وماسك الشغل هنا
: انا من طرف محامي من المنصورة اسمه ( نشأت نجيب ) وجاي اسأل عليه بخصوص قضية كانت تخص اخته
مدحت : قضية تخص عمتو احلام
: ايوة قضية تخص السيدة احلام عبد الدايم السنهوري
مدحت : ايوة بس عمتو سابت المنصورة من زمان اوي
: والله يا بني هو لو يقدر يجي المنصورة هو او عمتك يبقي كويس في حاجة ظهرت تثبت حق عمتك في ورثها وممكن ترجع لها حقها ولحد كده يا ابني متسألنيش انا حاولت اوصلكم باي تليفونات مقدرتش وكان السبيل الوحيد اني اجي
مدحت : ماشي انا حاقوله

—————————————————–

فلاش باك ———————– يوم الثلاثاء

في شقته جالس وهو يزفر دخانه وقد علت ابتسامة الغل محاياه نظر للهاتف في انتظار الماكالمة المرجوة
دقائق ورن الهاتف
هشام : ايوة يا معتز ايه الاخبار
معتز : كله تمام انا مراقبهم من يوم ما وصلوا بس لحد دلوقتي مفيش غير حازم بس اللي بيخرج من الشالية يروح المسجد يصلي ويرجع
هشام بغل : كمان بيروح المسجد طب يا معتز انت جهزت كل اللي طلبته منك
معتز : كله تمام ، انت جاي امتي
هشام : الخميس الصبح حاكون عندك
معتز : اوكي يا هشام مستنيك
بعد غلق الهاتف هشام في نفسه : شهر عسل سعيد يا زومة

—————————————————–

فلاش باك ————————- الثلاثاء مساءا

بخطوات مسرعة هرول من اجل ان يراه
مدحت : ايه اللي حصل يا ماما
اعتماد : والله يا ابني ما انا عارفة ادخل شوفه جواه ، الدكتور بيقول ان ضغطه ارتفع تاني وقال يبعد عن الزعل
اتجه مدحت الي غرفة ابيه
مدحت : سلام عليكم
نبيل : وعليكم السلام يا ابني
مدحت : ايه يا بابا سلامتك
تنهد نبيل : ربنا يسترها يا ابني ، مراتك وندي عاملين ايه
مدحت : كويسين وندي كويسة قوي ولو تعرف اني جاي كانت شبطت فيا
نبيل : يا رب يا ابني ندي فعلا تكون كويسة
مدحت : ندي بنتي
نبيل : لا ندي بنت عمك
مدحت : بابا انت في حاجة في موضوع جواز ندي قلقاك
نبيل : اسمع يا ابني انا عارف كويس دلوقتي قد ايه انت اتغيرت ولو جرالي حاجة بنات عمك امانه في رقبتك يا مدحت واللي انا حاقولهلك دلوقتي عايزه سر بيني وبينك ومهما حصل لندي انا عايزك تقف جنبها