قبل فوات الاوان ٣

حازم :عموما انا عارف ان الرد عليا دلوقتي صعب وكل اللي انا عايزه انك تفكيري في طلبي وتفكري بعقلك قبل قلبك مع اني عارف ان كده طلبي حيكون اصعب بس انا عايزك توافقي وانت متأكدة اني حاعمل المستحيل علشان ابقي استهلك مع اني عارف يا ندي اني مهما عملت بردوا مش حاستهلك
اخيرا خرج صوتها متسألة : طب وجوازك من جوليا
حازم : الاسم ده انا طردته من حياتي كلها من يوم ما شفتك واوعي تفتكري اني ظلمتها بالعكس بس وعموما كلمي دادا محاسن واسأليها هي حتحكيلك اللي حصل علشان يمكن متصدقنيش انا
ندي : ايه اللي حصل
حازم : انا طردتها انهاردة من البيت وعموما اوعدك اني احكيلك كل حاجة بس دلوقتي ممكن اعرفك حتفكري في طلبي ولا
امتلك ندي التردد ولم تجد رد فقاطعها مرة اخري
حازم : طب ممكن اطلب منك طلب
ندي : اتفضل
حازم : ممكن تبقي تأخدي الكارت اللي في الورد وتقريه وتفكري في اللي مكتوب فيه كويس

نظرت ندي الي ناحية الورد ثم نظرت ناحيته وأومت برأسها
حينها دخلت شريفة ونفيين محاولين فتح اي حوار عن اي شئ

شريفة : ولوجي عاملة ايه يا استاذ حازم
حازم : الحمد لله كويسة
نفيين : هي عارفت ان ندي مشيت
حازم : عارفت في الاول عيطت جامد اوي وبعدين هديتها واولتها ان ميس ندي ان شاء الله حترجع وتعيش معانا علي طول وساعتها قعدت تتنط من الفرحة

ابتسمت نفيين وشريفة لكلماته واتجه بصرهم ومن قبله حازم الي ندي التي باتت تشعر ان درجة حرارة وجهها اعلي من درجة غليان الماء ، حينها قرر حازم ان يستأذن وتوجه لباب الشقة واتجهت معه شريفة وخلفها نفيين
حينها توجهت ندي من ورائهم باتجه الورد لتأخذ الكارت حينها التفت حازم التفافة اخيرة ليراها وما ان رأها حتي ابتسم وشعرت حينها بالاحراج انه لاحظها فاطبقت يدها علي الكارت حتي لا تلاحظه امها او اختها واغلق الباب

شريفة : وبعدين بقي في اللي حصل ده
نفيين : ايه يا ماما هو حازم مش عاجبك ولا ايه
شريفة : يعني اخرتها اختك تأخد واحد كان متجوز وعنده بنت
نفيين : وايه المشكلة لو بيحب ندي وبنته كمان بتحبها فيها ايه
لم تسمع ندي كلماتهم كل ما كان يجول في خاطرها ان تدخل غرفتها وتقرأ المكتوب في الكارت ولكنها شعرت ان هذا سيشعرهم بشئ فقاطعت الكلام
ندي : انا داخلة الحمام اغسل وشي
وضعت الكارت في جيب عباءتها وتوجهت لتغسل وجهها نظرت الي المرآة كم كان وجهها احمر من شدة الخجل حينها اغلقت الباب جيدا وفتحت الكارت لتجد كلماته
( اوعدك من انهاردة مفيش ولا حازم الزاني ولا حازم الخاين من انهاردة مفيش غير حازم التايب ، حازم اللي اتولد علي ايدك من جديد )
لم تعرف اتفرح او تبكي ، اتصدق ام تكذب لكن كل ما قالته : ياريت يا حازم يا ريت