قبل فوات الاوان ٣

حازم و هو يحاول تصنع السعادة : السلام عليكم ، ازيك يا ندي
ندي : ازيك يا حازم ، انا قلت حاسمع صوتك قبل كده
حازم : انا لسه صاحي دلوقتي
ندي : ايه ده هو في عريس بينام لحد دلوقتي ده انت عريس كسلان اوي
حازم بابتسامة يعلوها الضيق : معلش بقي مكنتش عرفت انام امبارح ، المهم حتروحوا الكوافير امتي
ندي : متشغلش بالك احنا ممكن ناخد تاكس وانا ونفيين حنبقي مع بعض يعني
حازم : لا يا ندي احنا كنا متفقين بصي البسي واجهزي وانا حاصلي الضهر واجي علي طول ، اوكي
ندي : طب يا حبيبي ربنا يخليك ليا
حازم باستغراب : انتي قولتي حاجة
ندي : ايوة ، قلت ربنا يخليك ليا
حازم : لا قولتي حاجة تانية
ندي : يا حبيبي اقولهالك تاني
حازم بابتسامة وهو يتنهد : لا كفاية كده

———————————————————-

وقفت امام دولابها وهي شاردة اما الفستان الذي سترتديه اليوم وبعدها وضح انها تذكرت شيئا اضحكها بدأت تضحك ملئ فيها وهي تضرب كفا بكف فقاطعتها ندي
ندي : ايه يا نفيين انتي بتضحكي علي ايه خير
نفيين وقد فاقت من شرودها : انتي كنتي بتقولي حاجة
ندي : خير القمر معانا علي الارض ولا في المريخ
نفيين : في ايه يا ندي المفروض ان انا اللي اشتغل عليكي انهارده مش انتي
ندي : المفروض بس البيت ده مش محسسني خالص ان انا العروسة وكمان حضرتك سرحانة ومسخسخة علي اخرك خير افتكرتي ايه ، ضحكيني معاكي
نفيين : ابدا والله انا بس افتكرت يوم كتب كتابك فقعدت اضحك
ندي وهي تلف ذراعها حول كتف نفيين : نفيين انتي معجبة بعصام ، مش كده
نفيين بتلعثم : ايه يا بنتي الكلام ده انتي دماغك راحت بعيد الموضوع كله موقف وضحكني
ندي : عموما يا نفيين انا عايزكي بس تخلي بالك من نفسك ونصحتي الوحيدة لكي ( من تعجل شيا قبل اوانه عقب بحرمانه )
نفيين : ايه يا بنتي كل ده انا —————–انا بس افتكرته لما سحب المنديل
ندي : صح وساعتها راح باصص عليكي انتي وانتي طبعا فاهمة معني ده ايه
نفيين : انتي اخدتي بالك
ندي : ايوة وعموما لو فعلا عايزك يا نفيين يبقي يدخل البيت من بابه فاهمني طبعا
نفيين أومت برأسها : فاهمكي ، والله حتوحشيني يا نادو وبجد البيت حيبقي رخم اوي من غيرك انا مش متخيلة ان مش حاشوفك تاني
ندي : ليه يا بنتي هو انا حاموت ده انا حاتجوز
نفيين : ماشي بس مترجعيش تقولي يا ريت اللي جرة ما كان
ندي وهي تتحدث في اذنيها : بصي يا بنتي انا مؤمنة بالحكمة اللي بتقول منك لله يا اللي اتجوزت ومنصحتنيش ومنك لله بردوا يا اللي حتتجوز ومتسألنيش