الشقه الجديده حكايات روماني مكرم ١

كنا بنخلّص إجراءات نقل ملكية الشقة الجديدة، الموظف في الشهر العقاري كان بيبص في الشاشة وينزل بالنظارة، وبعدين يرجع يبصلي. فجأة وقال بصوت جاد: — مدام، الشقة دي باسمك فعلًا… بس فيه “حظر تصرف” مسجل على رقمك القومي من سنتين. اتنطرت من مكاني. — حظر تصرف؟! حظر ليه؟

أنا عمري ما دخلت محكمة ولا عليا ديون! الموظف ضغط كلمتين على الكيبورد، وقال وهو بيقرا من الشاشة: — صدـ,,ـــر ضدك حكم غيابي بسداد مبلغ كبير، ومكتوب إنك المضمنة لزوجك في عقد قرض بضمان عقار سنة 2022. اتجمدت في مكاني. — قرض إيه؟! أنا ما وقعتش على أي قروض في حياتي!

بصيت لسامح مستنية ينفي، لكنه اتوتر بسرعة، ووشه اصفر، ومسك إيدي وقال بنبرة مش طبيعية: — أكيد السيستم فيه حاجة غلط يا حبيبتي.. يلا نمشي ونبقى نرجع وقت تاني. شدّيت إيدي منه. — نمشي نروح فين؟! بقولك عليا حظر تصرف وأحكام وأنا معرفش!

رفضت أتحرك، وطلبت من الموظف يوريني أصل الملف أو أي إثبات. الموظف طلب الملف الأرشيفي الإلكتروني، ولما فتح الصورة الممسوحة ضوئيًا للعقد، بصلي باستغراب وقال: — الغريبة إن الإمضاء والبصمة موجودين، وفي خانة “الضامن” مكتوب اسم حضرتك والرقم القومي بالتفصيل… واللي قدم الورق واستلم الشيك كان الزوج.

لفت الشاشة ناحيتنا. اسم سامح كان مكتوب كامل. سامح الشريف عبد الفتاح. رقم موبايله. وصورة بطاقته الشخصية مرفقة مع الورق. وفي خانة الشاهد الأول… توقيعه. وفي خانة الضامن… اسمي وبصمة إيد ورقم قومي صريح. الموظف بص لسامح: — أستاذ سامح… التوقيع ده بتاع حضرتك؟

سامح بلع ريقه، اتردد لحظة وقال بصوت مهزوز: — مش فاكر… الكلام ده من سنتين، وأنا دخلت في مشاريع كتير وقتها. ضحكت بصدمة: — مش فاكر إنك أخدت قرض بضماني وباسمي؟! سحبني من إيدي بضغط وقال بصوت واطي: — يا ندى بلاش فضايح هنا..

بقولك أكيد موضوع قديم واتقفل وسقط من السيستم، يلا نروح البيت ونفهم. الموظف دخل في الكلام بهدوء: — لأ يا فندم، القرض ما اتقفلش. الأقساط متوقفة من سنة، والبنك بدأ يتخذ إجراءات التحفظ على أي أملاك باسم المدام. سألت الموظف وأنا قلبي بيقترب من التوقف: — والقرض ده كان بكام؟

وباسم مين الأساسي؟ رد الموظف: — القرض باسم شركة تسويق عقاري، والمدين الأول سيدة اسمها (رانيا م.)، وحضرتك الضامن المتضامن. أنا وسامح متجوزين من 7 سنين. أنا معرفش واحدة اسمها رانيا. ولا عمري سمعت الاسم ده في حياتنا. بصيت لسامح: — مين رانيا دي يا سامح؟