الشقه الجديده حكايات روماني مكرم ١

الشيطان اللي كنت عايشة معاه تحت سقف واحد لسبع سنين، كان بيبني قبــ,,ـــــري القانوني خطوة بخطوة وهو بيبتسم في وشي. وقف ببرود، تعدّل ياقة قميصه، وقال بصوت واطي ومحسوب: — بكرة الصبح هتروحي الشهر العقاري، وهتسحبي الطعن، وهتقولي إنك افتكرتي وإن الموضوع كان بموافقتك..

وأنا هتكفل إني أسدد للبنك جزء من المبلغ وأعمل إعادة جدولة. لو عملتي غير كده.. مش بس شقتك هتروح، أنا هسيب الورق كله يلّبسِك القضية لوحدك، ورانيا عندها مستندات تثبت إن الفلوس دخلت في حسابات تخص أوراق باسمك إنتِ كمان!

— أنا بظبط موقفي يا ندى.. والذكية هي اللي تحافظ على بيتها ونفسها. ساب الأوضة وخرج، وسمعت صوت باب الشقة بيتقفل بقوة. قعدت على الأرض، الدموع جفت في عيني وتحولت لنــ,,ـــــار. الشنطة كانت جمبي، فتحتها وطلعت أوراق العقد الممسوحة اللي أخدتها من الشهر العقاري.

بدأت أقرا كل كلمة، كل بند، كل توقيع. اسم رانيا.. اسم الشاهد الثاني.. اسم الشركة: (الشركة المصرية للتطوير والعقارات). وفجأة.. عيني وقعت على السجل التجاري المرفق في ظهر العقد. رقم السجل: 104582. تاريخ التأسيس: يناير 2022. اسم المالك الأساسي: رانيا محمود عبد السلام.

واسم المدير المسئول اللي ليه حق التوقيع والتعامل مع البنوك: سامح الشريف عبد الفتاح. ما كانش مجرد شاهد أو ضامن.. سامح كان المدير التنفيذي للشركة! هو الشريك المستتر والرأس المدبر لكل حاجة! لكن المفاجأة الأكبر ما كانتش هنا.

. في آخر ورقة من الملف، كان فيه صورة من كشف حساب بنكي أترفق في ملف الضمانات.. كشف حساب جاري باسمي أنا، عليه حركة سحب وإيداع بمبالغ ضخمة طوال سنة 2021! حساب في بنك أنا عمري ما دخلته ولا فتحت فيه حساب في حياتي!

مسكت الموبايل وإيدي بتترعش، وجبت رقم المحامي الخاص بوالدي الله يرحمه، الأستاذ حسام. رنيت عليه، ولما رد، كان صوته دافي ومشفق: — أهلاً يا ندى يا بنتي.. خير؟ — أستاذ حسام.. أنا في مصيبة.. ومحتاجة حضرتك فورًا.

شرحتله اللي حصل في الشهر العقاري باختصار، وعن العقد ورانيا والبصمة. الأستاذ حسام سكت فترة طويلة، وسكوت المحامين ده دايماً بيبقى معناه إن الموضوع أكبر من مشكلة عادية. — ندى.. اسمعيني كويس. اللي بتقوليه ده مش مجرد تزوير قرض..