جواد بلا فارس ٦

*************************************
خفق قلب “إيمان” بقوة وهى تسمع جرس الباب ثم ترحيب أبويها وأخيها بـ “كريم” .. وقفت تردد بعض الآيات القرآنية علها تهدئ من روعها .. لكن هيهات .. كانت تقرأ بلا تركيز .. ابتسمت “آيات” وهى تتأملها قائله :
– يا عيني .. وشك أصفر زى اللمونه .. كل ده من أخويا “كريم”
التفت اليها “إيمان” قائله :
– “آيات” اسكتى دلوقتى أنا مش قادرة أتلم على أعصابى
ضحكت “آيات” وقالت :
– أمال هتخرجى تعدى معاه ازاى
احمر وجهها بشدة وهى تقول :
– مش عارفه .. انا مش هقدر أخرج .. بجد مش هقدر .. اطلعى قوليله يفوت علينا يوم تانى
أطلقت “آيات” ضحكة عالية وهى تقول :
– حلوة فوت عيلنا يوم تانى دى
تظاهرت بالخروج وهى تقول :
– خلاص من عنيا هروح أقولها كده
جذبتها “إيمان” من ذراعها وهى تهتف :
– انتى ما بتصدقى .. كنى هنا .. خليني اعرف أسمع اللى بيحصل بره
بعد دقائق دخلت والدتها قائله بحماس :
– يلا يا “إيمان” .. تعالى قدمى العصير عشان تعدوا تتكلموا مع بعضيكوا .. الراجل مستنى بره
قالت “إيمان” وقد شعرت بأنها على وشك البكاء :
– لأ مش عايزه .. مش هقدر اخرج .. هو لازم يعني يتكلم معايا
نظرت اليها أمها وقد اتسعت عيناها وهى تقول :
– يلا يا بت بلاش دلع الراجل مستنى بره
ثم تأملتها هاتفه :
– ايه ده يا منيلة .. ما تحطى حاجة على خلقتك دى .. استنى أما أجبلك قلم الكحل وصباع الروج بتاعى
أوقفتها “إيمان” قائله بحزم :
– مش هحط حاجة ريحي نفسك
شهقت أمها قائله بغيظك :
– يا بت اسمعى كلامى يا بت .. حطى اى حاجة على خلقتك تديكي منظر
– قولتك لا يا ماما
تدخلت “آيات” قائله :
– متقلقيش يا طنط هى كده زى القمر مش محتاجة حاجة .. وبعدين “كريم” عارف انها مبتحطش ميك آب
قالت وهى تغادر:
– انتوا حرين .. بنات فقر صحيح . يلا يا “إيمان” انجزى
وقفت “إيمان” وهى تشعر بأن قدميها تصطكان ببعضهما البعض .. ظلت تردد بعض الأذكار .. وهى تأخذ من والدتها الصنية .. اهتزت الأكواب من رعشة يديها واضطرابها فاعطتها الى والدتها مرة أخرى قائله :
– بقولك ايه شيليها انتى .. انا لو خدتها ودخلت بيها هتدلق منى وهيبقى شكلى زبالة
قالت أمها بتبرم :
– آه يانى .. طيب ادخلى .. خلصينا الراجل مستنى