مذكرات عاشق الكاتبة صفاء حسنى الفصل6/10
مذكرات عاشق الكاتبة صفاء حسنى من الفصل 5/10
الصفحه السادسة .. مذكرات عاشق …. الكاتبة صفاء حسني الطيب
************
تجلس حنين في الفراند، الليل ساكن والنسمة خفيفة بتمرّ على وشها كأنها بتلمس وجعها. نظراتها تايهة ناحية السما، لكن عقلها جوّه الورق اللي بين إيديها.
مدّت إيدها على الدفتر، فتحته على الصفحة الجديد قلبها دقّ بسرعة كأنها عارفة إن اللي مكتوب هيهزّها من جواها.
بدأت تقرأ بصوت خافت، مبحوح:
“حبيبتي… آسف إني قولتلك كل ده دلوقتي، عارف إن اعترافي جه متأخر، بس أنا بحبك… بعشقك يا حنين.
كنت براقبك في كل لحظة، عشت معاكي كل فرحة وكل دمعة… كل وجع منك كان بيوجعني أكتر.
فاكرة أول دمعة لما والدتك رفضت تدخلي حقوق؟ وقتها حسّيت إن الدنيا ظلمتك، بس برضه كنت قويّة… دخلتي رغم الكل، ووقتها عشقت فيكي الإصرار.
كنت متردد أعترف بحبي ليكي، ٣ سنين في الجامعة وأنا ببصلك من بعيد… ولما أخدت القرار، حصلت الحادثة… بقيت قعيد على الكرسي المتحرك، والكرسي ده كان السبب إني أضيعك منّي.”وممكن القدر ليه حسابات ثانيه
تسكت حنين، عينيها تلمع بالدموع، تمسحها بسرعة كأنها مش عايزة تعترف إنها اتأثرت.
صوتها يتكتم وهي تهمس:
“عندك حق القدر دايما ليه حسابات مختلفة وبتجبرني على حجات بتكون أصعب منى
تبدأ تتذكر، تغمض عينيها… والمشهد يرجع فلاش باك:
كانت حنين واقفة في صالة البيت تبكي بعنف، صوتها بيرتعش وهي تنادي:
– “عمو حسام، تعال الحقني!”
يخرج حسام بسرعة من غرفته، ملامحه فيها قلق:
– “مالك يا حنين؟”
حنين بعفوية ودموع:
– “حاول تقنع ماما، أنا عايزة أدخل حقوق! ده حلمي، يا عمو حسام، زي ما كنت بتحلم تدخل شرطة ومقدرتش.”
حسام بابتسامة خفيفة:
– “إيه المقدّمة دي كلها يا ستي؟”
وفاء تدخل بعصبية وصرامة:
– “الأستاذة جابت ٩٨٪، يعني تدخل كلية من كليات القمّة، وتيجي تقول حقوق!”
حنين بعناد طفولي:
– “كنت عايزة أبقى دكتورة زمان، بس خلاص… نفسي أبقى محامية. الدكاترة كتير، لكن الناس المظلومة أكتر.”
حسام بابتسامة إعجاب خفي:
– “طيب، وأبوكي رأيه إيه؟”
وفاء بتنهيدة:
– “موافق طبعًا، انت عارف بيعشقها دي، مش بيرفضلها طلب.”
حسام وهو بيحاول يخفف التوتر:
– “هو فعلاً كده مع الكل… طيب خلاص، يا (حنين)، أنا هتكلم معاها.”
حنين تضحك من بين دموعها وتقول برجاء طفولي:
– “قولها والنبي، خليني أحقق حلمي، وأنا أوعدك أساعدك بعد كده في كل قضية تمسكها.”
