مذكرات عاشق الكاتبة صفاء حسنى الفصل6/10
مذكرات عاشق الكاتبة صفاء حسنى من الفصل 5/10
دمعة خفيفة خانته ونزلت،
وهي شافته، قلبها اتقبض.
(حنين وهي تبصله بحيرة ووجع داخلي)
“يا ترى ليه بيعيط؟! حزين كده ليه؟
ولا علشان شافني مع سامح؟”
سامح كان بيتكلم، لكن هي ما كانتش سامعة غير صوت قلبها.
(حازم بعينه اللي مليانة وجع)
“انتي مش فاهمة حاجة… ده هيخدِك مني وللأبد.”
(سامح بضحكة خفيفة وهو يلاحظ سرحانها)
“سرحانة في إيه يا حنين؟”
وبعدين لفّ عينه ناحية الاتجاه اللي كانت بصاله،
وفجأة اتفاجئ:
“إيه ده! مش ده ابن عم أسر؟ الله يرحمه… الكابتن حازم؟ كويس اتعافى أهو.”
(حنين وهي بتحاول تسيطر على ارتباكها)
“آه، واضح كده.”
(سامح بيرفع حاجبه بدهشة وهو بيتكلم بنغمة ساخرة)
“عجيبة والله… هو لسه باقي كويس وبيمشي مع واحدة كده؟!
بس دي… صاروخ.”
(حنين بتقطب ووشها يشد)
“عفوًا؟ بتقول حاجة؟”
(سامح وهو يهرب بالنظر)
“هه… لا، ولا حاجة. تشربي إيه؟”
(حنين وهي تحاول تسيب جو التوتر)
“لا كفاية كده، أنا هروح ألحق أجهز الأكل لإياد.”
(سامح بنبرة رجولية وهو يحاول يفرض وجوده)
“نشتري أكل جاهز من أجمل مطعم في البلد.”
(حنين بتزفر ووشها بيشد أكتر)
“إزاي يعني؟ هو أنا مكسّاحة؟ ولا موت؟”
سامح اتغيرت ملامحه فجأة، العِرق في رقبته شد، وصوته خشن:
“انتي بتكلّمنِي كده إزاي؟!”
(حنين بدهشة وهي ترفع حاجبها)
“في إيه يا عمو سامح؟ أنا بتكلم عادي.”
(سامح صوته بيعلى مرة واحدة والعصبية بتخرج من ملامحه)
“ألف مرة قلتلك أنا مش عمّو، فاهمة ولا لأ!”
ومسك إيدها بعنف.
(حنين تصرخ وهي تسحب إيدها)
“آااه! إيدي! إنت مالك يا حضرة العقيد سامح؟!”
سكت لحظة، وشه اتبدل، العصب اللي كان مشدود فَكّ،
(سامح وهو يبعد إيده بسرعة)
“آسف… آسف يا حنين، بس طريقتك في الكلام عصبتني.”
(حنين وهي تبصله ببرود)
“واضح إن حضرتك متوتر،
بس أنا كلامي كان عادي جدًا…
نأجل الغدا ليوم تاني أحسن.”
(سامح وهو يزفر ويهدي نفسه)
“طيب… حاضر.”
من بعيد، حازم كان بيتابع المشهد كله بعينه،
حزين وسعيد في نفس الوقت،
حزين لأنه شايف الشخص اللي بيحبها بيتعامل معها بعصبية،
وسعيد… لأنها حطت حدود واضحة ما بينهم.
خرجت حنين من المكان،
وبعد شوية، كان حازم بيكمل اللقاء مع رهف.
(رهف وهي بترتب ورقها بابتسامة)
“وفي نهاية الحلقة، بنشكر الكابتن حازم الحائز على بطولات عالمية…”
