حارسها ج الاخير

اتسعت أبتسامته و هو يفتح لها باب سيارته لتصعد بها ، ثم صعد هو الاخر و توجه الي مقهي قريب ، فنزلا و جلسا به و طلبا قهوة ، فبدأت نور الحديث قائله :
– أحكيلي بقا عامل ايه و دنيتك عاملة أيه ؟
– دنيتي ماشية اهيه و أترقيت كتير اوي و أديني مركز في شغلي
– و خلود و عبدو أخبارهم أيه ؟ و ياسمين و جيهان خرجوا ولا لسه من السجن.

– جابو فارس و روضة و اهم عايشين أهم قارفني بخناقاتهم اللي مش بتخلص ، اما جيهان و ياسمين فياسمين بعد 3 شهور لاقوها منتحرة بعد خبر وفاة باباها علطول ، وجيهان خرجت بس أهلها طردوها من البيت و فيه عربية خبطتها و ماتت ، المهم سيبك مني و منهم ، انا حياتي مملة قوليلي انتي عملتي أيه في حياتك
تنهدت و هي تجيبه بأبتسامة :
– أتخرجت و روحت أشتلغت في فرنسا و بعدين ربنا كرمني و فتحت شركة و بقت من أشهر الشركات علي مستوي أوروبا كلها
ثم أكملت بفخر و غرور مصطنع :
– بقيت بيزنيس ومان قد الدنيا.

ضحك علي طريقتها قائلا :
– و الله وحشتني الفشخرة الكدابة بتاعتك دي
ضحكت هي الاخري و جاء النادل مع القهوة و أستمر حديثهما طويلاً حتي نظرت الي ساعته قائله :
– انا اتأخرت أوي و لازم أمشي
– طب يلا علشان أوصلك علشان متروحيش لوحدك
– مش هتعبك ؟
نظر لها بسخرية :
– هتتعبيني لما أوصلك !! أمال اللي كنتي بتعمليه معايا زمان ده أيه كنتي بتموتيني !!

ضحكت و هي تقف قائله :
– كانت أيام و كنت لسه صغيرة انا دلوقتي 38 سنة يعني عدي أكتر من 10 سنين و انت بقيت كام صحيح
أبتسم و هو يقف و يضع النقود علي الطاولة قائلا :
– 44 سنة يا ستي
أمسكت وجنته بيدها بخفة قائله :
– بقيت عجوز مكحكح يا تيمو
أبعد يدها بسخرية قائلا :
– قال يعني انتي اللي لسه 15 سنة ، يلا أمشي قدامي.

ذهبا سويا الي السيارة ثم أنطلق تجاه الفيلا فسألته :
– متجوزتش ليه يا تيمو لحد دلوقتي ؟
نظر لها قائلا :
– انتي عارفة ليه ، و انتي ؟؟
أبتسمت و أجابته :
– انت عارف ليه.

أبتسم من جديد و هو ينظر الي الطريق أمامه حتي وصل الي الفيلا فتحدثت قائله :
– بجد يا تيمور انا مبسوطة جدا اني شوفتك كنت واحشني جدا ، عدي وقت كتير أوي و احنا مش سوا ، هات رقم موبايلك علشان كل ما أنزل مصر أكلمك نتقابل ، ولا عاوزها تيجي صدفة ولا أيه ؟
أبتسم و هو يمسك بهاتفها و يسجل رقمه ثم أتصل علي نفسه قائلا :
– لا خوديه أهوه ، أنتي مسافرة أمتي فرنسا ؟؟
– الفجر
– خلاص هستني الأجازة الجاية تتصلي بيا علشان نتقابل تمام.