مذكرات عاشق الكاتبة صفاء حسنى من الفصل 11/14
مذكرات عاشق الكاتبة صفاء حسنى من الفصل 11/14
حازم:
– إيه؟
كانت هنا؟ إمتى؟
ليه مشفتهاش؟
مراد بكلام طفل بسيط قال:
– مشيت من نص ساعة يمكن…
كانت زعلانة شوية.
حازم حسّ إن الدم بيجري في عروقه أسرع…
كأنه اتخبط،
كأنه اتفاجئ من اللي عمره ما حب يعترف به:
إنه لسه بيحبها…
وإنها مجرد ما بتيجي… الدنيا بتتلخبط.
بص ناحية هالة ووليد…
وبعدين بص لنفسه.
– هي كانت قريبة… قوي
– ومشيِت… من غير ما تبص في وشي حتى.
– بتبعد ليه؟… وخايفة من إيه؟
—
🔥 في اللحظة دي… كانت حنين خارجة من الشارع اللي على النيل
وقفت تاكسي بسرعة…
رجعت حنين البيت…
دخلت بهدوء، من غير ما حد يحس بيها.
ساندت نفسها على الحيطة، نفسها كان مقطوع… الكلام واقف في زورها، وجعها كان جواها… وجع مفيش غير ربنا اللي شايفه.
اتوضّت، ووقفت تصلّي…
ركعت، وسجدت… وكل سجدة كانت كأنها بتطلع شهقة وجع حابسة نفسها فيها من امبارح.
—
طلع أسر من الأوضة، وشه باين عليه قلق… ولما شافها لسه لابسة خمار الصلاة، وقف قدّامها:
أسر:
– كنتي فين كل ده؟ اتأخرتي ليه؟
حنين بصوت هادي ومكسور:
– أنا آسفة… الخطوبة أخدت وقت.
أسر بصوت فيه غيرة واتهام:
–… هو كان هناك؟
حنين تتشدّ من جوّا:
– تقصد مين؟
أسر يقرب منها خطوة، ووشه قرب يبقى قدام وشها:
– اللي قلبك وعقلك معااه…
حنين اتسعت عينيها بخوف:
– مش فاهمة… تقصد إيه بس؟
أسر فجأة صوته يرقّ… ويبقى شبه طفل تاه من أهله:
– أنا عارف إنك رجعت من بدري وكنت قاعده مع ربنا سبتيني… ورحتي تصلي…
سمعتك وإنتي بتعيطي… وبتتكلمي معاه…
هو… هو ممكن يسمعنا؟
أنا عارف إنه بيكرهنا… وإنك كمان بتكرهيني…
أنا… نفسي تحبّيني… وهو كمان يحبّني…
حنين تقفل عينيها من الوجع:
– ليه بتقول كده؟
أولاً… إنت امبارح كنت سكران…
ما ينفعش أول يوم في حياتنا يبدأ كده… ده غلط.
أسر:
– هو المفروض أول يوم يكون إزاي؟
حنين تستجمع نفسها بالعافية:
– الرسول ﷺ قال…
الزوج يتوضّى، والزوجة تتوضّى…
يصلّوا ركعتين شكر لله…
ويدعوا ربنا يبعد عنهم الشيطان…
لكن من غير صلاة… ومن غير عشا… ومع شرب…؟
أكيد الشيطان يدخل بالبشاعة دي!
سكت أسر…
وبعدين قرب فجأة، وركع عند رجليها…
لف إيده على وسطها وهو بيعيّط زي طفل مكسور:
أسر:
– أنا… إنسان كويس يا حنين…
عارف إني غلطت في حقّك…
وعارف إنك اتجبرتي على الجوازة دي…
بس… كنت نفسي تحبّيني…
أنا بحبّك من زمان…
وانتي مش كنتي شايفة غيره…
والله هتغير…
هكون بني آدم تاني…
علّميني أصلي…
علّميني ربنا يحبّني…
اصبري عليّ…
خلي الناس تتشرف بيا مش تكرهني…
نفسي… نفسي أبقى زي حازم…
